Ххувшаврил байрандалул гьантрай Гъумук, Хъунмасса Буттал КIанттул цIанийсса дяъвилул гьурттучи АхIмадов Кьурван АхIмадлул арс ялапар хъанай ивкIсса къатрал чIирайн лачIун дурунни аьпалул ула.

Ва ишираву гьуртту хьунни Дагъусттаннал паччахIлугърал цачIунбув музейрал хъунаманал хъиривчу Заира Кильдиева, Лакрал райондалул Дяъвилул ва захIматрал ветерантурал советрал хъунама Сулайман ХIажиев, «Ххяххабаргъ» кказитрал редактор Мусалав Мусалаев, оьрчIащалсса ва жагьилтуращалсса даврил отделданул каялувчи МахIаммад Гадаев, Гъумучиял школалул учительтал ва дуклаки оьрчIру, аьраличунал гъан-маччами.
Цала тухумрай никирая никирайн ирсирай нанисса пишагу чIивинияцIава лавхьхьуну, Гъумук мукьва класс къуртал байхту, зий айивхьуну ур буттацIун заргалну.
Дяъви байбивхьусса гьантрайва лавгун ур ватан дуручлан. Талай ивкIун ур Украиннал фронтрай 136-мур полкраву. 1943 шинал кулпатрайн дуркIун дур Кьурван ятIа-тIар бакъа акъа хьуссар тIисса тил. Му чIумал Кьурван ивкIун ур кIусса щаву дирну госпитальданий. Госпитальдания итаакьавривун шавай тIайла уклай унува, ххувшаву ласунцIа таланна тIий, Берлиннайн ияннин лавгун ур.
Дяъвилия зана шайхту, зий ивкIун ур мува цала пишалий – заргалну. Цаппара шиннардива дайдирхьуну дур дяъвилий щаву дирсса ка кьакьлай. Операция бувну, ккуллалул цIалцIи дурккун махъ цIунилгу цала пишалий зий айивхьуну ур. Амма шиннардий чурххавух занай диркIсса цIалцIилул къювурдал бас увхьунссия, 1973 шинал оьрмулул 71 шинаву аьпалухьхьун лавгун ур.
Кьурван дакIнийн утлатисса ихтилатру бувна Сулайман ХIажиевлул, Мусалав Мусалаевлул, Аслан Къажлаевлул, Заира Кильдиевал, Гъумучиял школалул учительница Роза Бавасулаймановал ва цайминнал.
Ппу дакIнийн утан бувкIцириннахь барчаллагь увкуна Кьурваннул душнил Написатлул.

Зулайхат Тахакьаева