Жижаралун кIанай
Апрель зурул 28-нний, жувагу кьабивтун, ахиратравун лавгунни лакрал шеъриятраву цайминнаха къалархьхьусса тIитIавуртту дурсса лакрал шаэр, Вихьуллал шяравасса КIуруххъал ХIасан. Ттун къакIулли ттула ци иш бикIанссарив, ссурахъу ХIасан чIарав акъани, ванал хъярчру ттущалва къабуллалийни. Гьакссагу бизаршиву дикIанссар.
Вихьуллал шярава лахъсса шеъриятрал шачIанттуйн лавхъсса цалчинма шаэрди ХIасан. Цала шяраваллил сийгу, цIагу хъун даву дакъагу, ванал чивчуссар Лакрал, Дагъусттаннал шеъриятравугу хъунасса шаэр ушаврил ххару. Сурат дишаврилмур даву кьадиртун, ванал язи дургьуна, школа къуртал бувайхту, шеъриятрал дуниял. Ва дуниялгу ванал ляхъан дуллай къаикIайвача, жунна ххал къахъанахъимур аьлтта чIалачIи дувайва.
Ванал нину Аьлиханова Сиянат, аьпа биву, цуппагу пагьму-гьунарду Аллагьнал чIявусса буллусса хъамитайпа бикIайва. Бухьунссия ганил геннал луртамалул гьану бивзун ХIасаннул аькьлу-кIулшилувугу.
ХIасаннул хъунисса давурттив дурссар журналистика гьаз даврил чулуха жула жяматрал дянив. Цала «Илчи» кказитрай чичлай ивкIсса макьаларттаву ванал гьаз къабувсса, дискуссиялувун къалавсъсса масъалартту хъинну чанну бакъа бакъахьунссар. ХIасан ия цала кIулшиву мудангу цайминнащал кIидачIин ччисса журналист. Ттун хIисав хьуссар, шагьрулий, шяраваллаву инсантал, бавтIсса мажлисрай, макьнатIисрал кунма, ХIасаннучIан кIункIу тIун бикIайва. Ванал пикри-зикрилух вичIи дишин мякьну бикIайва. Уну тIий энциклопедиялул даражалийсса кIулшиврул луртамалул инсан. Ялагу ттунма ХIасаннущал буллалисса ихтилатраву ци хIисав шайва учирча, тачIав ванал цама инсаннай рязи акъасса, жагъаласса махъ зумату буккан къабувайва. Гъанссаннал, дустурал оьрмулуву хьунадакьайсса аьркинлугъру биттур дуван, чIарав ацIан муданагу хIадурнува икIайва.
ХIасаннул инсаншивруяту чичларча, хъинну чIявусса затру чичин хьунссия. Ттунма тачIав дакIния къагьанссар дукIу гъинттул ХIасаннул, Вихьлив цала буттал къатравун цIуцIавурттал бас аврия игьалаган увкIсса чIумал, ттухьва увкумур. «Гьула, ина Лаккуйсса инсаннахха, хIакьину ци чувшиву дував?» — куну, суал буллусса чIумал, на ци чинссарив къакIулну ливчIсса чIумал, ХIасаннул ттухь: «Ина гьарца кьини ший, Лаккуй, чувшивуртту дуллан аьркинссара», — куна. Дурссар цала ХIасаннулгу цимирагу чувшиву.
Цибанссар, Аллагьнан укун ччай бухьунссия жула дянива ХIасан батIул уван. Утти, дакI аьратталсса чIумал, муксса асар къахъанарчагу, чIун лаглагиссаксса жуна ХIасан чан хъанахъаву дикIантIишиврийнгу вихну ура. Амма, къяцIул кунна, чIуен дуллалисса дакIнива, ттула пикрирдава ссурахъу ХIасан къагьантIишиврийн, нава сагъну уссаксса чIарав икIаншиврийн мукIруссара. Игьалаглагу, ттул ссурахъуй ХIасан!
ХIажимурад ХIусайнов
