Аслийсса зунтталчу, ххаллилсса шаэр, Шяъбаннул арс ХIасан КIурухов аьпалул шаврил кьурчIишиву кIидачIлай, жижара буллай буру щалагу «Илчи» кказитрал редакциялухь, ХIасаннул кулпатрахь, душварахь, махъсса гъан-маччанахь.
РухI хъинний дишиннав, алжаннул ххари аннав. Ванан къабуллусса оьрму махъминнан булуннав.
Ккурккуллал школалул учительтал ва дуклаки оьрчIру
Ина ияв шаэр мяйжаннугусса
КIурухов ХIасаннул аьпалун
Ина ияв шаэр мяйжаннугусса,
Шагьи кIункIу буван яхI бакъаххайсса.
Вил шеърирдал ххару ккулларду бия,
Кьадар, яхI бакъултрал къюкIру ппив дайсса.
Винмалусса бия вил шеърирдугу,
Нигь дакъа ссаякIуй, ттявх-ттявх тIутIисса,
Дакъая миннуву щихьчIав лергъ тIаву,
Ялувми рязи бан икрам-къанч бусса.
Ина ттун кIул хьусса ччяниваявхха
Гьайкал тIисса шеъри ляхъан бувнийва
Дагъусттаннал жаллад Ермоловлуха,
Нигь дакъа, цан лайкьсса ххару чивчусса.
Абадлул-абадлий, бивкIу къакIулну,
ЛичIантIиссар шеъри ина чивчусса.
Вил цIагу, суратгу бивкIу бакъасса
ЯхьунтIиссар лакрал миллатрал дянив.
Амин Аьбдуллаев
