Лакрал театр ххираминнан бикIу, музыка, балайрду ххираминнан бикIу хIисав хьуссар Уручлатусса актриса ва балайчи Анисат АьбдуллатIипова махъзуманив сахIналийн къабуккайшиву. Мунил творчество ххираминнан тамаша бивзхьунссар, гьай-гьай, му зат. Ччайгу бикIантIиссар Анисатлул сахIна кьабитаврил савав кIул дуван. Мунил цилванияр ххуйну щилчIав къабусанссар сававгу.
— Анисат, 18 шинай Лакрал театрдануву зий бивкIсса ина цакуну театр кьабитаврил савав цир?
— Мяйжанссар, на ларгсса гъинттул жулва театрданущал гастроллай лавгссара, ссуттил тIурчарив, театрданува лавгссара. Гьай-гьай, бигьану бакъая 17 шин цачIу дурсса коллективрава гьан, гастроллайсса аьрххи- ххуллурдай инсантурал кувннал кувннахсса ччаву хъиннура цIакь шайхха, чIявусса ччатI цачIу бувкусса, ххаришивурттугу, кьурчIишивурттугу цачIу дурхIусса ттулва коллективрах цIакьсса ччаву дия, уттигу дуссар. Амма ттун балайчинал ва актрисал оьрмулуву цирив диял къахъанахъисса, ттула оьрмулия нава къарязийсса чIун дуркIун дия. Мукьра шинал хьхьичIва, чак буллай байбишайхту, бухлай бавчуна дакIнивун ттула оьрмулия нава къарязийсса асарду. Исламрал кIулшивуртту куртIгу, цIакьгу дуллансса зуву дагьуна. Ттун бувчIуна ттулва оьрмугу, гихунмаймур ххуллугу гьамин исламрацIун бахIин аьркиншиву. Цамур куццуй утти ттущава зунгу, яхъанангу къахьунтIишиву. На Дагъусттаннал Муфтиятрал хъаннил отделданул хъунмурну зузисса Аьйшат НурмахIаммадовал (жу ванийн муаьллим Аьйшат учару) видеортту ххал дуллан бивкIра интернетраву. ДакIния щин хIачIлачIисса кунма гъалгъа тIун бикIай цуппагу. Ца кьини сивсура муничIан чичин. На цIувххуссия, исламрал кIулшивуртту ласун цумур вузравун буххан маслихIат буванссия куну. Аьйшат – муаьллим му ппурттуву Нальчикрай бивкIун бия, тиха бучIайхту, жува хьунабакьинну тIий чивчуна. На «Рисалат-холдинграву» нюжмардий цал мунил буккайсса лекциярдайн занан бивкIра. Лекция наниссаксса хIаллай, ттул иттав макь дучIайва. Ца кьини ттучIан гъан хьуна Аьйшат-муаьллим, жу ихтилат бувссия. Гания мукьах ттул оьрму нацIусса, яргсса асардал авадан бувна. ЧIявусса ссурвал ттул лагма лавгуна, цанма кIулмур лахьхьин буллай, аякьалий вив лавсунав. Ссурваврал ихтилат ттун дарувну хьуна. Ттун бувчIуна ттунна диял къахъанахъимур рувхIанийсса ххуйшиврул дуниял диркIшиву. Му дунияллийн багьайхту, чаннайн бувккунна.
— Вил дакIнил хIужрардаву ччянива бухьунссия му мякь. Цакуну, ца кьини къаучIайхьунссархха инсан мукунсса дазулучIан?
— Бухьунссия. Цукуннив къазразанну бияв на махъсса шиннардий, бяйкьусса кьурукь кунма. На бувсъссия Аьйшат- муаьллимлухь, нава зузисса даврия ттунна цукунчIавсса ххаришиву дакъашиву. Амма ттун захIматну бия бази дуван, му ламу лавхъун, тий бацIан. Аьйшат- муаьллимнал на му иширал хIакъираву кIихIуллану бушиву ва щайх АхIмад-хIажиначIан буххан ччай бушиву бусайхту, цилва буцинна увкуна щайхначIан. Ца нюжмардува бувцунав. Ттун кIула, щайхначIан буххарча, ттувува театр, сахIна кьабитансса хъит учинсса гуж лякъинтIишиву. Мукун хьугу-хьуна. На щайхначIату бувкра, цамур инсан хьуну. Мунал ттухь я «хIижаб рути», я «даву кьарити» къаувкуна. Мунащалсса ихтилатрайну нава тIайласса ххуллийн буккан тIий бушиврул умуд цIакь хьуна. МуначIату буккайхту, тIайланма лавгра даврия мурахас бувара тIисса аьрза булун.
— Му иширая пашман хьусса муттагу хьурив?
— Къавхьунни тачIавгу. Ялунгума, талихIрал чанна бунни оьрму. Исламрал ххуйшиврия, марцIшиврия буслай бусан къахьунссар. Аллагьнал цIаний дуллалимунищал лаяйсса цичIар дакъассар! На Дагъусттаннал исламрал университетравун дуклан бувхра. Ххарил лехлай бачара университетравун. Цалчинмур курс къуртал бував. Ттул оьрмулуву эбратрансса инсанну хьуна, аьпа биву, хъуннабава. Му Аллагьнайн вихсса, цIакьну диндалул ххуттай бавцIусса инсан бия. Мунин Мубараксса Кьурандалул лу дакIних кIула. Жу хьхьичIавасса Кьурандалул лу хIурматрай ябуллай буссару. Та луттирайн ябияйхту, мудангу хъуннабава хьхьичI дацIай. Ттун мудангу хиял бикIайва та лу буккин лахьхьин. Утти ттула хиялданучIансса манзил гъан хъанай, цуксса ххарину духьунссар ттул дакI!
— ИчIувацириннал цукун кьамул дуври вил оьрмулувусса дахханашинна?
— ЦIубутIуй ттул лас вихнугума акъая, на, ччатI лякъайсса давугу кьадиртун, ичIаллил кушурдалссагу буллай щябикIанссар тIий. Ххуйсса ччатI лякъайсса тIий чIурчIав дуллалиссагу, хъатIайн, хъиншивурттайн занай бухьувкун балайрду тIий, маэшат къаоьккия. Шаппами аьдат хьуну бия на гастроллайн занай, хъатIайн, хъиншивурттайн занай. Аьдат хьуну бия шаппа чIявуну къаккаклай. Ва ялагу. Мигу бухьунссия балай къатIий ттуща бацIан къахьунсса ххай. Утти на, мяйжанссар, нашидру учара, миннул хьхьичIра-хьхьичI ттулламур дакI аьчух дуккан дурну, рахIат дувай. Ласгу, утти на муданма шаппа, ичIаллил къайгъурдалсса, оьрчIалсса буллай чIалай, ххарину ур. Буниялттунгу, ужагъ, ичIалу бур хъаннил кIану. Ванияр хъамитайпалуцIун бавкьуссагу, тIааьнссагу кIану бакъар. На укунсса талихIрая, тирххандарая уттинин махIрумну бивкIун бура. Щукру Хъунасса Аллагьнайн, КIанал зана риртунни ттухьхьун ттущара нара зерххусса тирхханну ва ххаришиву.
Ихтилат бувссар ПатIимат Рамазановал
