Хъунмасса, лахъан къахьунсса зарал! Так цаха цува лавхьхьусса шаэр. Поэзиялул цалуннасса планета, цийнгу чин бучIисса КIуруховлул планета куну! Циваннивав ялувсса Заннан ххуй-ххуйми, щихачIав къалавхьхьуми цачIанма буцлан ххирасса.
Жула миллатрал ххалли-ххаллилсса арсурвавращал архIал лаглагисса хханссар цивппа зунттурдугу. Шаэртал жула миллатрал дянив хьунтIиссар цаймигу, амма ми цаягу къаикIантIиссар КIуруховлуха лавхьхьусса. Гьакссагу хъювсулну ура. Жижара буллай ура ттухьва навагу, жула циняв халкьуннахьгу.
Чаллахъал Ширвани
***
Жула ялун бивунни кьурчIисса хавар. Оьрмулул ва творчествалул аргъираву личIи хьунни жуятува Дагъусттаннал гьунар бусса шаэр ХIасан КIурухов. Дагъусттаннал литературалийн бивссар хъунмасса щавщи.
Чичлай лакку мазрай ивкIхьурчагу, мунан ххаллилну кIулну бия оьрус мазгу, му ия дунияллия хавар бусса, чантI увкусса инсан. Вих хьун ччай бакъар му акъашиврийн. Амма шаэртал ликъатIайссар. Ми, ца дунияллия бивзун, цайми-цайми дунияллайх аьлтту буклайри лагайсса. Ххуллухъин баннав вин, жул аьзизсса уссу!
Файзудин Нагиев
***
ЩихачIав къалавхьхьусса надирсса шаэр. Му ия, Дагъусттаннал литературалул традициярттал дазурдаватугу тихун ливчуну, чичлачисса шаэр. Хасну мунал творчествалуву хIасул хьуну дия цалархIал Европанал ва Дагъусттаннал культуралуцIух авцIусса шаэрнал сурат. Му ия цайна цува тачIав хаин къавхьусса ва щилчIав рахIмулух ялугьлай къаивкIсса шаэр. ХIакьсса шаэр. Цал бунагьирттал аьпа баннав!
Миясат Муслимова
***
Лавгунни жуятува хъунасса лакрал шаэр, публицист ХIасан КIурухов, мунал цала асардаву ягинну чIалачIи дунни цува яхъанахъисса заманалул лишанну. Жула дянивату шаэртал лаглан бивкIукун, исватну чIалан дикIай жулла хIакьинусса кьинирдал аьдадашиву, мюрш-кьюршшиву. Шаэртурал ларсун лагайссар цащалла эпохалул аромат, му яла тачIав щищачIав зана ритангу къашайссар. Цири личIайсса Шаэр ухлавгун махъ? ЛичIайссар мунал бивкIу бакъасса дуниял.
Ххазина Аминова
***
Нартътал бикIайссар чурххал кьуват цIакьсса, гуж хъунмасса. Амма буссар цаймигу – кьаламрал мицIлих аьлам кIура баен бан бюхъайсса, халкьуннал дянив ислахIшиву дайсса. Мукунминнавасса ца ия жула ХIасан КIурухов. Аллагьнал рухI хъинний дирхьуну лякъиннав!
Гъан-маччаминнащал, щалагу «Илчилул» коллективращал кьурчIишиву кIидачIлай ура.
Илияс Къапиев
