Вай гьантрай республикалий кIира кьинисса най диркIунни «Кьурукьирттал ссапар» тIисса автомотопробег. Ва хас дурну дия Ватан дуруччултрал аьпалун ва мотосезон тIитIлатIисса иширан.
ДР-лул Миллатирттал иширттал министерствалул бусаврийну, мотопробеграл аьрххи багьну бур, МахIачкъалалия тIайла хьуну, Избербашрайн, Дарбантлив, Сергокъалалийн, Ххунзахъун, Гагатлив, Бущихъав, Гимрилийн. Аьрххилул манзил аьмну хьуну бур 413 км.
Ванивух гьуртту хьуну бур «Хьхьунил барцIру» мотоклубрал вакилтал, Дагъусттаннал мотоциклистътал, Дарбантливсса кадетътурал корпусрал дуклаки оьрчIру, М. НурбахIандовлул цIанийсса Сергокъалаллал лицейрал дуклаки оьрчIру ва цаймигу.
Ва даврил мурад бур ялун нанисса ник тарбия дан цIакьсса вирттаврал эбратрай, жула Дагъусттаннал тарихрал аьдат-эбадатрал, культуралул ххазинарттай.

З. АьбдурахIманова