Бюхттулсса Ххувшаврил кьинилун хасну щалагу Аьрасатнаву най дур аьдатравун дагьсса личIи-личIисса акциярду. ХъунмурчIин ми дур мурхьру бугьлагьи­сса «Ххувшаврил мурхьру» ва «Ххувшаврил тIутIив» тIисса цIардалу сакин дурсса.

Экологиялул шинал лагрулий ва Ххувшаврил байрандалун хас дурсса хъунна­сса акция хьунни вай гьантрай Ккуллал райондалийгу. Мунил сиптачи ур «Справедливая Ро­ссия» партиялул Ккуллал райондалийсса отделениялул хъунама Валиев МахIаммад ХIусайннул арс.
Райондалий бугьан МахIам­мад лавсун увкIун ия 650 мурхь: 500 ахъулссаннул (100 мурхь кякандалул, 350 гьивчул, 50 бяълилул), 150 щавщилул ва мажи. Кьу-кьува мурхь бавчIунни райондалул гьарца шяраваллийх. ЛивчIми бувгьунни цала бу­ттал шяраву Хъусрахь. Ахъул­ссаннул мурхьру бавчIунни шяраваллил агьулданийх цала-цала ахъаву бугьан. Щавщилул ва мажилул мурхьру бувгьунни, цувагу гьурттуну, дуклаки оьрчIащал школалул чIарав ва Буттал кIанттул цIанийсса Хъунмасса дяъвилий жанну дуллу­сса чиваркIуннан дацIан дур­сса гьайкалданучIа. Ва гьайкалданийсса кIиттуршунния лирчу­сса цIардавух дуссар Валиевхъал кулпатравасса ряха уссил цIагу. Буттал кIанттухлу талан лавгун, зана къавхьусса Юсуп, Аьвдуллагь, МахIаммад, ХIажи, Зайпу­ттин ва Рамазан МахIаммадлул буттал буттауссурвалли. Вайннал аьпалун хас бувну бур ва базилухсса акция.
Ххувшаврил байрандалун хас бувсса мурхьру бугьаврил акция буллай МахIаммад айивхьуссар шиннардил хьхьичIва. Цалчин­сса акция хас дурну дия Совет Союзрал кIийла Виричу АхIмад-Хан Султаннул аьпалун. Ванал цала къуртал бувсса Виричунал цIанийсса Каспийскаллал 8-мур школа-лицейрал хIаятраву бувгьуссар 150 щавщилул мурхь, дук­лаки оьрчIругу лагма лаган бувну.
Ва акция даврийну, Ватандалухлу жанну дуллуминнал аьпа буруччаврищал, МахIаммад ур хъун хъанахъисса ник ватан ххирану тарбия хьунсса эбрат цайнура ккаккан дуллай. Ххувшаврил байрандалул гьантрай дакIний ур ттигу ца акция «Ххувшаврил тIутIив» дуван – Хъусрахь школалул чIарав ва дяъвилия зана къавхьуминнал гьайкалданучIа 70 сиреньдалул къатIа бугьан. Гихунай ниятрай ур Ххувшаврил кьинилун хасну мурхьру бугьлагьисса акция Ккуллал райондалий гьарца шинал даван.
МахIаммадлухь барчаллагь тIий, райондалул шяраваллал бакIчитал дакIнийн бутлай бур зурдардил хьхьичIгу ванал гьарца шяраваллин оьрчIру бялахълан­сса гьайжакру (качелартту) ва ттуп­ру буллуссар тIий.
МахIаммад барчаллагьрай ур акция дансса цала сипта хъинчулий ккавккун, му чулийн дуккан бан кабакьу бувсса ДР-лул Халкьуннал Мажлисрал хъунаманал хъиривчу Камил Давдиевлуйн ва Шяраваллил хозяйствалул министерствалул управлениялул каялувчи Эмиль Ттаттаевлуйн.

МахIаммад Валиев ув­ссар 1987 шинал МахIач­къалалив. Къуртал бувссар Совет Союзрал кIийла Виричу АхIмад-Хан Султаннул цIанийсса Каспийскаллал 8-мур школа-лицей. Москавливсса Аьрасатнал граждан авиациялул университет­рал экономикалул факультет. Зий уссар ДР-лул Промышленностьрал ва машлул министерствалий хъунама пишакар-экспертну.