Вай гьантрай яруссаннал «ХIакьикьат» кказитрал редакциялий республикалул журналистътуращал хьунабакьин бувкIунни базаллуву ттучанну ччувччусса ацIниясса хъами.
Миннул, ца-цаних бизлай, бувсунни цалва маша байсса кIанттурду, ттучанну ччуччаврийну цуксса зараллу хьуссарив, цIанасса ппурттуву ичIаллил тагьар ци дуссарив.
Хирумивова ПатIиматлул бусаврийн бувну, ва яхъанай бур лаякъат­рай, ларсун дур 2 кредит – ца-ца 500 азарда къурушрансса, машан ларсун дур квартиралул каркас, кредит дулун ливчIун бур уттигу – 5-6 барз. Ттучан ижаралий лавсун бур, зуруй 20 азарда къуруш дуллай, налогру дулайсса диркIун дур 6 азарда къуруш зуруй, къаралчинан – 8 азарда къуруш личIину. «Утти ттуща къахьунссар кредитру лахъан, зеххин­ссар дузал буллалисса квартирагу, канихь дакъар яхьунсса арцугу», — тIий, аьтIун бивкIунни ПатIимат.
Жаватханова Анисатлул бусаврийн бувну, вагу, ванил ласгу бур инвалидтал, вайннал бур 4 оьрчI (2 студент). ЧIярусса арцу дарурттах дулайсса диркIун дур, утти, базаллувату къажанжу дакъахьукун, оьрчI-бакI ччаннай бацIан бан къахьун­ссар. «Жун гъан-маччанал кумаг буллай бур, азарда, кIиазарда къуруш дуллай, укунгу таниннин ялапар хьунссару. Турциянаву ларсъсса хъуслил буржру лахъан бувар уттигу», — тIий бур Анисат.
Цайми хъаннилгу бунни мукунмасса ихтилатру. Цаппара хъами бия, ласру бакъа, кулпатру цалва дуланмагъ буллалисса, мукунминнай лапра къия хьуну дур. Миннан кумаг буллай бур «Инсан» тIисса ихIсандарал фондрал дукиялийну.
Жу, журналистътурал, буллусса суаллахьхьун жавабру дуллай, хъаннил бувсунни укун: «Жухь увкунни цайми базардаву маша буллансса кIанттурду булунну куну, амма ти­кку так бачIвасса чIиртту бур. Жун аьркинни тикку ттучанну бувну, дузал баншиврул 200-300 азарда къуруш харж дуван, ялагу чIярусса арцу аьркинни даххансса хъус машан ласун. Жун кумаг буллай бакъархха!
Жулла тIалавшинну жу бусарду ДР-лул ХIукуматрайгу, МахIачкъалаллал администрациялийгу. Жу тIалав буллай буру жунма хьусса яла чIивимур зарал лахъаву, цанчирча базар ччуччаврил тахсир жуй бакъар, цIу дагьну диркIссар жу шаппа бигьалаглай бивкIсса кьини. Га кьини базаллуву марцIшиву дайсса кьини диркIссар.
Жун шагьрулул администрациялул дуллунни 750 къуруш гьарца зарал бивманан: 1 млн. къуруш дарчIуссар 1300 инсаннайх. Мури жун бувсса щалва кумаг. Миннух жу цукун зуву?».
ЦIу дагьаврийну зараллу бивминнан кумагран хасну дузал бувну бур сакиншинналул комитет. Комитетрал бакIрайн лавсун бур циняв хIукуматрал давурттай зузиминнал ца кьинилул къажанжу дичин бан цIу дагьаврийну зараллу бивминнан кумагран.

ХIасан Аьдилов