Республикалий чахуткалул къашавай шаврил тагьар захIматнура личIлай дур, мунил буруккин буллай бур Дагъусттаннал Роспотребнадзорданул зузалт. Так ца апрельданий сияхIрайн лавсун ур чахуткалул къашавай хьусса 1221 инсан, миннавату сайки бачIиссаннай (46,7%) ляркъуну дур лахъаймур журалул азар.

Яла чIявуми къашавай хьусса бур МахIачкъалалив – 31, Хасавюртуллал райондалий – 10, Къизилюртуллал райондалий – 9, Къизлардал райондалий – 6, Буйнакск шагьрулий – 6 инсан. Циняв къашавай хьуминнал 82% бур 18-50 шинавусса инсантал, шяраваллаву ялапар хъанахъисса хIисавну бур 59,8%.
Къашавай хьуминнавату 83% хIисавну бур официалну къазузиминнан, амма хъиривлаявуртту даврийну кIул хьуну бур къашавай хьуминнал бачIи зий бушиву дахху-ласулул бутIуй, кафердаву, транспортрал хIаллихшинну даврил бутIуву. Микку бувчIин аьркинссар: базардаву, ттучаннай, кафердаву зузиминная ва мукунма транспортрай пассажиртал буцайсса шофертурая хъуннасса нигьачIаву душиву лагмаминнан. Чахутка лахъайсса азарди, мунил лиян байссар гьутру, ттаркI-базурду, нярал система ва цаймигу базурду. Цила чIумал азар хъин къадарча, инсан ивчIайссар. Чахуткалул къашавай шаву ччяни кIул даншиврул, агьалинан аьркинссар профилактикалун флюорография дуван кIира шинай цал.
Дагъусттаннал Роспотребнадзорданул агьалинайн лабизаву дуллай бур цалва гъан-маччаминнал цIуллушиврух аякьа дуллан, цила чIумал хъирив бизан, чахуткалул азар кIул даву мурадрай. Ва азар хъин дан шайссар, цила чIумал кIул дурсса чIумал. Роспотребнадзор мукунма лабизлай бур даврил щаллу буллалиминнайн ва ишбажаранчитурайн, чахуткалул азарданул къашавайшиврул хIакъиравусса документ бакъа даврийн кьамул къабуллан.