Май зурул 18-нний Дагъусттаннал паччахIлугърал ссихьрал театрдануву хьунни цIуллу-сагъшиврул нукьсансса оьрчIал республикалул фестиваль «Паруса надежды». Мунил сиптачитал бия Дагъусттаннал КIулшиву дулаврил министерство ва МахIачкъалаллал КIулшиву дулаврил управление.

Мура фестивальданул лагрулий хьунни «Хъинсса мукъул дакIру чантI учин дувача» тIисса , дунияллул халкьуннал творчестволул конкурсраву ххув хьуминнан дипломру буллалисса церемония ва чIава автортурал произведенияртту бивщусса луттирал презентациягу. Ва конкурсралмур сиптачиталгу бур ялув кIицI лавгсса идарартту ва Ильман Алипулатовлул (чIаваманал) цIанийсса ИхIсандалул фонд «Подарим детям завтра». Фондрал хъунаманал, машгьурсса тележурналист Ильман Алипулатовлул бувсунни мероприятиялул гьанумур мурад бушиву гьунар бусса оьрчIал чIарав бацIаву, литературалул конкурсрай ххув хьуминнал произведенияртту бивщусса луттирду итабакьавугу, оьрчIру ххари бансса даву душиву.

Луттираву щалвагу Дагъусттаннаясса 119 автор ур, чIава литератортурал чивчусса произведениярттал жанругу личIи — личIисса дур: сочинениярду, эссерду, хIатта поэмардугума. Произведенияртту цивппагу оьрус, ингилис, немец мазурдийсса ва дагъусттаннал халкьуннал мазурдийсса бур. Дагъусттаннал ХIукуматрал председательнал хъиривчу Екатерина Толстиковал цалва ихтилатраву кIицI лавгуна , гьашину 1 сентябрьданий республикалий чIава литератортуран кумагрансса филологиялул школа тIитIлашиву. Къазаннал Федеральный университетрал, жагьилтурал политикалул ва физкультуралул департаментрал директор Юлия Виноградовал кIицI лавгуна литературалул конкурс машгьурсса чичултрал , цIанихсса шаэртурал билаятрай хьушивугу агьамсса ишну хъанахъишиву, конкурсирттал оьрчIру цалва пагьму-гьунар аьркинну бушиврий дакI дацIан бувайшиву. Конкурсрай ххув хьуминнавух бия лакку оьчIругу. Оьрус мазрай ва кьатIаллил билаятирттал мазурдий произведенияртту чивчуну хьхьичIунсса кIантту бувгьуссагу бухьунссия лак. Лакку мазрай чивчуну ххув хьуминнавух бия МахIачкъалаллал № 30 – мур лицейрал дуклаки оьрчIру: Исмяилова Шагьрузат (1- мур кIану), Аьлиева ПатIимат (2 – мур кIану). Хар-хавар бакъасса ххаришивуну хьунни ттун ттула арснал, №30 лицейрал 6-мур классраву дуклакисса Рамазанов Артурдул 1-мур кIану бугьаву. Ва кьини математикалул контрольный даву дуну ванаща диплом ласун сахIналийн лахъан гьан къахьурчагу, ниттил мазраха зий оьрму нанисса ттун, арсналмур ххувшавугу оьрус, ингилис мазурдийсса конкурсирдайнияр хьхьичIунссар. Шиккува кIицI лаганна, № 30 школалий лакку мазрал дарсру дихьлахьисса , Вихьуллал шяравасса Ума Чаринова оьрчIавун лакку маз лахьлансса гъира бутлатисса учитель бушиву. ДакI дарцIуну бура, ва конкурсрай ххув хьусса цайми школарттангу ниттил мазрал учительтурал тIайлабацIу хьушиву. Бия ххув хьуминнавух № 12 школалул 5- мур классирттаву дуклакисса Алина ва Амина Исуповахъул ва 3- мур классраву дуклакисса Наибов НухIгу. Вайннал учительница бур МихIадова Оксана. Бия №37 школалул дуклаки оьрчI Зубаиров Магьди( 1- мур кIану). Учительница Парамазова Ума. №22 –мур лицейрал ученик Оьмаров Зульпукьардулгу «Нанира дустал ЦIувкIрав» тIисса назму чирчуну хьхьичIунсса кIану бувгьунни. ЧIава литератортурал произведенияртту бищунну жугу вай гьантрай, ОьрчIру буруччаврил кьинилун хас бувсса « ЧIимучIалттуй». ДакIнихтуну барча буллай буру конкурсрай ххув хьусса оьрчIру ва учительтал!

Суратирттай : .Исмяилова Шагьрузат ва Альлиева ПатIимат( №30 школа. 
№ 30 школалий лакку мазрал дарсру дихьлахьисса Чаринова Ума 
Зубаиров Магьди (№ 37 школа) учительница Парамазова Умащал
 Алина ва Амина Исуповахъул, Наибов НухI (№12 школа) учительница МихIадова Оксанащал

ПатIимат Рамазанова