Жу бувсъссия хьхьичIмур номерданий, «Хъинсса мукъул чантI учин дувача дакIру» тIисса, дунияллул халкьуннал литературалул конкурсрай ххув хьуминнавух лакку оьрчIругу бушиву. Конкурсрай гьуртту хьуну бур щалвагу Аьрасатнавасса оьрчIру. ЧIава чичултрал произведенияртту бур кьатIаллил билаятирттал мазурдийгу. Оьрус мазрайгу. Бур дагъусттаннал миллатирттал мазурдийссагу. Конкурсрай ххув хьуцириннал произведенияртту бивщуну бур «Пусть слово доброе душу разбудит» тIисса луттирай. Ва луттиравасса лакку оьрчIал цаппара произведенияртту хIакьину жугу «ЧIимучIалттуй» бишлай буру. Цаягу автор лях гьан къаитанну, хъиривми «ЧIимучIалттуй» бищунну хIакьину къабивщуми.

Ттул дакIнил кьюлтIмур

Бия июнь барз. Дахьра тти­гъанну къуртал хьуну дия дуккаврил шин. Гьаманки, циняв ттущал дуклакисса оьрчIру цаннаяр ца лахъну буслай буссия, цивппа гъинттул чун бигьалаган най буссарив. Намур бура кьабагьну. Ттул бакIраву, цаннил ца къабитлай, чIявусса пик­рирду хIасул хъанай бур. Агарда ниттиуссичIан Москавлив гьарча…, ягу чIаххувоьрчIащал бигьалагай лагерьданийн гьарча… Амма цир микку ттун муксса хIаз бизансса бикIантIисса? КъакIулли. Цалсса кьабагьну бура. Укунсса пикрирдащал шаппай бивну лявкъунна. Бу­ттал ппу Аьвдуллагь, хIаятраву дургьусса тIутIах мюрш ивкIун уруглай, ссаллив пикрирдавун лавгун ия. На хIаятравун бувх­ссагума хIисав къавхьуна.Ттун ттатта хъинну ххирая. На тта­ттая цикIуй кьюлтI къабай­ссия. Вана цIанагу, ттаттал мяйжаннугу хIакьсса маслихIат баншиврий дакI дарцIуну, на ттула бакIраву щурущисса пикрирду ттаттахь аьч бував. «Гьай, ттаттал, дунияллий ххуйсса кIанттурду чIявуссар, амма вила буттал кIанттуяр ххуйссагу, ххаллилссагу кIану вин чувчIав къалякъинтIиссар. ХIазран бакъархха халкьуннал учала бу­сса, буттал кIанттайсса аьрщигу, щингу нацIуссар учайсса. Ина лакку душра, вилва буттал улча хъамабитан къабучIиссар, шинай цалвагу Лаккуйн къабиярча, хъамабитангу бюхъайссар». Ттул хьхьичIух, цалнияр цал чанна хъанай, балжину чIалан дикIлай, нава чIивиний шяравух лихълай, тIуркIу тIий бивкIсса суратру лехлан диркIуна. ДакI гьавасрал дурцIуна. КъюкI анаварну ришлан диркIуна. Вана ВацIилу, вана жу кIанил бакIраву, тархъанну бигьлагьисса барзуй тамаша буллай. Вана цамур сурат: щюллисса ар, арив тIилинтру бишлашисса бярчру. ДакIнийн дагьунни нину, ттула ппу хIав тIама дан лавгун, бявкъу щаращучIа нисирахун кIарттул ччатI канай, бигьалаглагисса чIун. Ттунмавагу къакIулна, на, ларсун ручкагу, тетрадьрал чIапIуй хатI бихьлай лявкъура. Вана лахIза. Вана дакIнивух бишлашисса та гьалаксса асар! Вана чун кIункIу тIий диркIун дурив ттул дакI! Буттал шяравун! Ца чунчIав цамур кIанавун! — учав ттухьва нава. Чагъаргу цIакьну карщул кьютIливу бахIав. Левчура ттаттачIан. «Ма, ттаттай, лабити ва чагъар, на хъунма хьуннин. Ва ттула оьрчIайнсса чагъарди. Ваний дунияллий яла ххуймур кIанттуя бувсун буссар!». Тта­ттал укунмагу мюрщисса яру хъиннува явш бивтуна. Мур­ччивгу рязину пиш-пиш тIутIи дуруна. «Ин ша Аллагь, ттаттал, Ин ша Аллагь!» — увкуна.

Амина Юсупова,
МахIачкъала, 12-мур школа

Ттул буттал улчай

Бюхттул зунттал минай,
Ттул буттал улчай,
Цукунсса мукъурттий,
КIицI дави вил цIа?

Щюллисса гъинттулгу,
Дюхлулсса гьава,
КIирисса гьантрайгу,
МикIларчIусса щин.

* * *
Ца чулух Щуну зунтту,
Гамур чулух Къимизу.
Щарнил хьхьичI майдансса ар,
Аьзизсса буттал кIануй!

БучIан ччан бикIай мудан,
Зунттал минай, ттун вичIан.
Щюлли къурух гайз буван,
Уртту-тIутIул кьункьавух.
НахIала бан дяркъу щин,
БакIщаращува найсса,
Люхъ-пюхъ тIий экьинайсса,
Мюрщи ратIал лирцIу щин.
ВичIи дишин ччан бикIай,
Аьтарттая ххурххулух,
Гъарал хъирив зунттаву,
Гьалакну чярхний найсса.
Ххуйшиву тIабиаьтрал,
Зунттавун лахънийн лавхъний,
Ялттусса бакIал зунттайх,
ЯтIул баргъ экьилавгний.

Шагьрузат Исмяилова,
МБОУ «Лицей № 30».

Щуну

Агь, Щунуй, жан Щунуй,
Бюхттулсса Щунуй,
Ссавнил лажиндарайн
БакI щусса Щунуй.
Щюлли кувссавату,
Дуккай банавша
Вил бакIрая яру
БатIиннив къашай.
НякIсса муруллава
Буккай щаращив,
Вил щуттардивату
Ттул дакI къадуккай.

ПатIимат Аьлиева,
МБОУ «Лицей №30»

ХIадур бувссар
ПатIимат Рамазановал