Майрал 21-нний хьхьирицIсса шагьрулул паркраву «Стоп ВИЧ/ СПИД» тIисса щалва Аьрасатнал акциялул лагрулийсса батIаву хьунни. Ва акция гьар шинах жула билаятрай дувайссар щалла дунияллий СПИД-рал азарданул ливтIусса халкьуннал аьпалун.

З. АьбдурахIманова
Дагъусттаннал хъуншагьрулий хьусса батIаврил сакиншинна дурну дия ЦIуллу-сагъшиву дуруччай министерствалул ва азарданул масъаларттаха зузи­сса къуллугъирттал. Паркраву хьусса акциялий гьуртту хьун бувкIун бия шагьрулул вузирдал студентътал, дуклаки оьрчIру, личIи-личIисса социал къуллу­гъирттал пишакартал, чIявучин кIулсса жяматийсса ишккаккулт, динчитал, цIаларгсса спортсментал ва цаймигу.
Шиккун увкIсса гьарнаща бюхълай бия уква ВИЧ-инфекция цайра дусса-дакъасса кIул дан, тест бувну махъ, багьайсса маслихIатирттах вичIи дишин.
СПИД-рал азарданул лив­тIуцириннаясса аьпалул махъру-ихтилатру хьуну махъ жагьилтурал дуруна циняв ца хьу­сса «лечаву». Гьурттучитурайх дарчIуна акциялул лишан дирхьусса значокру ва азардания хъун дакъасса информация ду­сса чагъарду.
Яруссаннал театрданул хьхьичI­сса майданнив балайрду тIий бия дагъусттаннал эстрадалул балайчитал.
Ахирданийгу СПИД-рал азарданул ливтIуцириннал аьпа­лун ссавруннайн кIяласса ва ятIулсса шарду итабавкьуна.
ДР-лул Роспотребнадзорданул хIасиллайн бувну, хIакьинунин Дагъусттаннай ВИЧ-инфекция дусса 1672 инсан усса ур. Азар ялун лирчусса хьхьичI шиннардий къашайшалт оьрмулул 18-29 шиннардивусса бивкIхьурча, цIанасса къашайшалт бур 30-49 шиннардивусса. Дагъусттаннай СПИД-рал азар душиву кIул хьусса 1989-ку шиная шинай сияхIрайн 2700 къашайшала лавсун ур. Вайннава 818 инсан ивкIуну ур.

Дагъусттаннай ВИЧ-ин­фекция душиву къашайшалтран кIул шайсса бур, лякьлуву оьрчI хьусса хъамитайпалул поликлиникарттай циятура тIалавсса анализру дуллалийни. ГанийхчIин буккайсса бур азар дусса ласнайн. Муниннин жагьилтал азардания хавар бакъа бур.
2016 шинал ахирданийнин Аьра­сатнаву сияхIрайн лавсун ур 1 миллион ва 114 азаллий 815 инсан. СПИД-рал къашайшалтраву гьарзану бусса бур оьрмулул 35-39 шиннардивусса арантал. Хъами тIурча – 30-34 шиннардивусса.
ВИЧ-инфекция хъунмурчIин лахъайссар наркотикру буллали­сса жагьилтурал ккураннаву.