ТачIав бакъачIин чIявусса агьлу бувкIун бия итникьини Лакрал театрданувун, увну 90 шин шаврицIун бавхIуну, жула цIанихсса шаэр Бадави Рамазанов дакIнийн утан.
Байбивхьуна аьпалул мажлис композитор, музыкант, балайчи Юрий Рыбаклул увкусса «Буттал къатта» тIисса балайлийну.
— ХIакьсса шаэрнал творчествалул, инсаншиврул оьрму байбишайссар га цува ивкIуну махъ. Щаллу дакъасса 50 шинай оьрму бувтсса лакрал шаэр Бадави Рамазанов тания шихунайгу 40 шинал манзилданий уттавана ур ганал лу тIитIайсса цума-цанналгу дакIний. Бюхттулсса асардайну ккаккан бувну бур Бадавинал творчествалуву буттал кIану. Ласияра ганал назмурдал цIарду: «ТIюва», «Чарттал чIурду» — цимурца чарттал лагма дур. Цала буттал улклул чартту гъалгъа тIутIи бан бюхъайсса шаэрнаща бюхъайссар халкьуннал дакIругу гъалгъа тIутIи дуван,- куна цала мукъуву Чичултрал союзрал хъунама МахIаммад АхIмадовлул.
Аьрасатнал магьирлугърал лайкь хьусса зузала Качар ХIусайнаевал кIицI лавгуна, цила ппу Абачара ХIусайнаев ЧIяв школа-интернатрал директорну зий ивкIсса чIумал, дустал хьуну, хъуннасса хIалашиву диркIшиву Бадави Рамазановлул кулпатращал ва му дусшиву хIакьинусса кьининингу душиву кIиягу шаэрнал оьрчIал дянив яхьуну.
— Ттул бутталгу, Бадавиналгу муданмасса ихтилат бикIайва лакрал тарихрая, магьирлугърая, миллатрал гьунттийсса кьинилия. Жу, оьрчIругу, тайннал насихIатрайсса, тIабиаьтрайсса хавардах мякьну бикIайссияв. ДакI мяш хьунсса кулпат бия Бадавинал. Къисттаман бия ганал махъсса къала, дакI тIайласса дус, къатлул кIини. Гайннал дянивсса ччавугу куртIсса духьунссия, Бадавинал бивкIу лялиян бан къавхьуну, лахъи къалавгун, гагу дунияллия лавгуна.
Ххарину бура Бадавинал поэзия хIакьинугу тIалавну бушиврия. Ванал назмурду «Интнил марч», «Урша гъавгъ душ» ккалаккийни, хIакьинугу иттав макь гьурххи лаглай дур. Миннуву муксса аьчухну ва чаннану хьхьичI бацIан буллай бур лакку билаят. Умуд бихьлай бура, ттигу цикссагу шиннардил махъгу, Бадавинал творчество вара куццуй тIалавну дикIанссар тIий, — увкуна Качар ХIусайнаевал.
Лакрал театрданул завлит Гулизар Султановал бувсуна Бадави Рамазановлул драматургиялия. КIива спектакль бивхьуну бур Лакрал театрданул Бадави Рамазановлул произведениярттал гьанулий, ва ми тамансса мутталий репертуардануву бивкIун бур. 1967 шинал Октябрь революциялун 50 шин шаврин хасну Дагъусттаннал гьарцагу миллатрал чичултрал чичин ккаккан бувну бивкIун бур цала-цала миллатрал дянива увксса революционернаясса пьеса. Бадави Рамазановлул чивчуну бур Гьарун Саэдовлуясса пьеса. Гулизар Султановал бусласимунийн бувну, тай пьесардаву яла пасихIну усттарну чивчумурну пишакартурал ккалли бувну бур Гьарун Саэдовлуясса пьеса.
Бивхьуну бур Курди Закуевлул «Хъявринсса ччаву» кьиссалия Бадавинал чивчусса пьесагу. Бувсунни му спектакль цIунил бишин хIадур хъанай бушиву. Ккаккан бувна спектакльданувасса ца парча.
Ккурккуллал школалул директор Даниял Магьдиевлул бувсуна ттигъанну цува гьуртту хьушиву ЧIяйннал школалул ххаллилсса даражалий хIадур бувсса Бадави Рамазановлул юбилейрал мажлисрай. Ванал кIицI лавгуна Бадави Рамазанов цала хIисав айшиву Лермонтовлул ва Некрасовлул Оьруснал паччахIлугърал кьадардануву бувгьусса кIану Дагъусттаннал кьадардануву бувгьусса шаэрнан.
Шаэрнал оьрмулувасса лахIзардаягу буслай, ванал шеърирдугу ккалай, мажлис бачин бувну бия Дагъусттаннал Халкьуннал артистал Аслан МахIаммадов ва Саният Рамазанова.
Бадави Рамазановлул чивчусса Гьарун Саэдовлуясса пьесалувасса парча, дуснакьравусса ГьаруннучIан нину дуркIсса лахIза, хъинну бюхханну ккаккан бувна Дагъусттаннал халкьуннал артистка Жинасат ДинмахIаммадовал ва театрданул жагьилсса актер Ибрагьим Мусиевлул.
Шаэрнал назмурду дурккуна Дагъусттаннал халкьуннал артистка Уди Аьлиевал ва ттигъанну Лакрал театрдануву хьусса «Щаращи» конкурсрай цалчинмур кIану бувгьусса Ваччиял школалул дуклаки оьрчI ХIаммакуев Аскандардул.
Мазагьиб Шариповлул, Амин Рамазановлул, Даниял Шабановлул макьаннахун шаэрнал мукъурттий балайрду увкуна ХIажиаьли ХIажиаьлиевлул, Халисат Батирбековал, Луиза Шагьдиловал, МахIаммад Амировлул, Зульфия Архилаевал, Ямлихан ХIажиевлул, Шамсуттин Къаплановлул, Загьидат Муслимовал, Зарият КьурбанмахIаммадовал, Жанна Кьурбановал. Вайннахун руцлай бия музыкантътал Арслан Шагьмарданов, ХIусайна ХIусайнаев, Ислам МахIаммадов.
Бадави Рамазанов дакIнийн утан бувкIцириннахь барчаллагьгу увкуну, буттан хас бувсса шеъри бувккуна душнил Изабелла Рамазановал.
Гъан-маччацириннал ва ЧIяйннал жяматрал цIания барчаллагь увкуна МахIаммад Аьйдаевлул.
Зулайхат Тахакьаева
