МухIсиннул арс Камалов Шамсуттин
Вай гьантрай оьрмулул 78 шинаву аьпалухьхьун лавгунни ДР-лул лайкь хьусса хIакин, медициналул элмурдал кандидат, Аьрасатнал академиялул медициналул ва техникалул элмурдал академик (РАМТН),Аьрасатнал чIалачIиндарал ва пластикалул реконструкциялул хирургтурал обществалул (ОПРЭХ) мяйжаннугусса член МухIсиннул арс Камалов Шамсуттин.
Увну ур Шамсуттин 1939 шинал КIулушацIрал шяраву. Ласгу дяъвилия зана къавхьуну, 17 шинавусса СахIибатлун тай захIматсса шиннардий цина хъуна уллан багьну бур арс. Гъумучиял дянивмур даражалул школагу къуртал бувну, итххявхсса, дуккавриву гьунар бусса Шамсуттин увххун ур Дагъусттаннал медициналул институтравун, мугу къуртал бувну, зий айивхьуну ур духтурну Ккурккуллал шяраву. Яла зун ивкIун ур Гъумук хирургну ва лор-хIакинну. Увххун Москавлив аспирантуралувунгу, лор кафедралий дурурччуну дур кандидатнал диссертация.
1969 шиная шинай, цала оьрмулул махъра-махъсса кьининин зий уссия МахIачкъалаллал муххал ххуллул азарханалий лор отделениялул каялувчину. 1995 шиная шинай уссия пластикалул ва эстетикалул хирургнугу.
ДакIнийхтуну бивхьусса захIматрахлу Шамсуттин лайкь хьуну ур хIукуматрал чулухасса чIярусса наградарттан, миннувух дур «ДР-лул лайкь хьусса хIакин» тIисса бусравсса цIагу.
Шамсуттин ия цала даву хъинну ххирасса, лавайсса даражалул хIакин. Мунищала архIал ия дакI-аьмал хъинсса, инсантуращал хIал бавкьусса, чIарав ацIан ка-кумаг бан чялишсса инсан.
Шамсуттин аьпалул шаврил хъуннасса кьурчIишивугу кIидачIлай, жижара буллай буру ванал кулпатрахь Зумрутлухь, арсваврахь МухIсиннухь ва Илдардухь, душнихь ПатIиматлухь, гъан-маччанахь. Цал гьав нурданул дуцIиннав, рухI алжаннул ххари даннав. Амин.
КIулушацIрал жямат
Аьпалул махъ
Вай чаннасса интнил гьантрай дунияллия лавгунни республикалул медицина хьхьичIуннай дан хъунмасса захIмат бивхьусса ххаллилсса хIакин, МухIсиннул арс Шамсуттин Камалов. Отоларингологиялуву Шамсуттин МухIсиновичлул дурсса хьхьичIуннайшивурттая, хIакиннал сававсса карунная Дагъусттаннал кьатIувгу кIулссар.
Ва ия Занналва хIакинну ляхъан увсса, икIайкунсса халкьуннал хIакин.
Шамсуттин Камалов ия ххаллилсса ппу, чIалачIин дакъа ххирая оьрчIал оьрчIру. Ванал хъуннасса аякьа дикIайва кулпатраха, гъан-маччанаха, кумаг байва дустуран.
ЧIярусса шиннардий ва зий уссия МахIачкъалаллал муххал ххуллул азарханалий. Бусравну ия архIал зузиминнан, даврил уртакьтуран ва ия хъинсса насихIатчи ва кумагчи.
Шамсуттин МухIсинович ия къашайшалтрай цIими бусса, инсаншиврул бутIа буллусса хIакин. Ппу эбратну хьуну, мунал ххуллу язи бувгьунни арснал Илдардул, арснал душнил Аидал.
Камаловхъал кулпатраву аьдатравун багьну бия 1-мур Майрал байрандалул кьини, цинявппа лагма лавгун, цачIу кIицI лагаву. ХIайп, гьашину кьисмат къавхьунни Шамсуттиннун цанма ххирасса агьлу-авладращал байран хьунадакьин.
Ххаллилсса пишакар, уздансса хасиятрал, аьчухсса дакIнил заллу Шамсуттин МухIсинович абадлий дакIний личIантIиссар гъан-маччаминнан, даврил уртакьтуран ва дустуран.
Мусттапаева Амина
Мусал арс Ссамадов Садикь
Гьашинусса Ххувшаврил кьини хьунадакьин кьисмат къавхьуну, цаппара гьантрал хьхьичI дунияллия лавгунни Хъунмасса Буттал кIанттул цIанийсса дяъвилул гьурттучи, ЧIяйннал шяравасса Ссамадов Садикь.
Увну ур Садикь 1919 шинал январь зурул 1-нний. Оьрмулул 17 шинаву, школагу къуртал бувну, увххун ур зун Ккуллал райондалул заготконторалийн экспедиторну. Ва даврий хьхьичIунну зузисса Садикь райондалул хъуниминнал итталун агьну, партиялувунгу кьамул увну, дуклан гьан увну ур Буйнакскалийн сельхозрабфакрайн. Ва къуртал байхту, кьамул увну ур ЧIявсса райондалул библиотекалул хъунаману. Дяъви байбишайхту Садикь тIайла увккун ур 229-мур битултрал полкраву Сталинград шагьру душманная буруччин. 1942 шинал август зуруй къизгъинсса талатавурттаву ванайн щаву дирну дур. Хъин хьуну, ччаннай авцIуну махъгу Садикь партизантурал кьюкьраву талай ивкIун ур. Дяъви къуртал хьувкун, ва тIайла увккун ур дяъвилул лекьа-пIякьу дурсса къатри дуллан Одессалийн, Москавуллал областьрайн. Дяъвилий ккаккан дурсса чувшиврухлу ванан дуллуну дур личIи-личIисса наградартту. Миннуву Садикьлун цанна яла бусравмурну дия «Сталинград буруччаврихлу» тIисса медаль.
ЯхI-къирият дусса, ххаллилсса зунтталчу, дяъвилул ветеран Садикь аьпалул шаврил кьурчIишиву кIидачIлай, жижара буллай буру ванал душваврахь ва махъсса гъан-маччанахь.
РухI хъинний дишиннав, алжаннул ххари аннав.
ЧIяйннал жямат
Кьубил арс Базаев Ширвани
Апрель зурул ахирданий, захIматсса цIуцIаврища ххассал къавхьуну, оьрмулул 69 шинаву дунияллия лавгунни ЦIуссаккуллал шяраватусса Кьубил арс Базаев Ширвани.
Ширвани Нефтекумскалий 40 шинай ккарччал техникну зий уссия, опыт бусса, даву ххуйну кIулсса пишакар хIисаврай, архIал зузиминнаву ва агьалинаву сийлий уссия. Ширвани ия хъамал ххирасса, инсантуращал хIал бавкьусса, гъан-маччаминнан, кьини дуркминнан кумаг буван чялиш уккайсса инсан. Мунал хъинсса багъгу буссия, захIмат ххирасса Ширвани муниха хIурматрай икIайссия, ужагърайн увхма хъамалу уванмур мунал багъраву чан къашайссия. Цувагу каруннил магьирсса, ичIаллил давурттивгу усттарну дувайсса, чIахху-чIарахнангу кумаг бувайсса, дакI-аьмал хъинсса уссия. Ххаллилну тарбиягу бувну, чивун буккан бувна Ширванинал шанмагу душ.
Хъиншивуртту дуллай оьрму гьан бувсса Ширвани дунияллия лагаврил кьурчIишиву кIидачIлай, жижара буллай буру Ширванинал щарссанихь, душваврахь, куявтурахь, наслулухь, гъан- маччацириннахь.
Ширванинал рухI хъинний дишиннав! Алжаннул ххари уваннав! Мунан къабуллумур оьрмулул бутIа наслулун ххи бувну лякъиннав!
ЦIуссаккуллал жямат, дустал-гьалмахтал,
Нефтекумскалий архIал зий бивкIми, чIаххул
Баннав вил хIакьсса аьпа
Ниттил Зубайдатлул
аьпалун
Цукун кьаритав, бавай,
Караматсса дуниял?
Цанна муксса кьюлтI хьусса,
МакIрарагу дакъасса?
Ххассал хьуссарав ина
Лавмартсса дунъяллуща,
Ларгссарав тти архIалла
ХIакьсса цамур дунъяллийн?
Барачатссар абадлий,
Бавай, ина дур Кьини,
Тти гьакь булай ЗанначIа
Баннав вил хIакьсса аьпа!
Вин ххираминнал, ина ххираминнал цIанияту Назира,
ш. Къизлар
Хъуннасса кьурчIишиву кIидачIлай, жижара буллай буру Ккурккуллал школалул учительница, жущала ца классраву дуклай бивкIсса ПатIима Мажидовахь, ванил ниттихь, уссурссуннахь, вайннал аьзизсса уссу, арс
Такьижуттин
аьпалул шаврийн бувну. Алжаннул ххари аннав, рухI хъинний дишиннав.
АрхIал дуклай
бивкIминнал цIания
Андриана Аьбдуллаева
ЗахIматсса цIуцIаврил рахIму къабувну, жула дянивату зевххунни ххаллилсса лаккучу, гьунар ххисса шаэр, чичу
ХIасан КIурухов
Лакрал театрданул зузалт, кIидачIлай ванал бивкIулул кьурчIишиву, жижара буллай буру ХIасаннул кулпатрахь, гъан-маччанахь, Вихьуллал жяматрахь, «Илчи» кказитрал зузалтрахь.
Лакрал театрданул зузалт
Жу, Ккуллал райондалул цIуллушиву дуруччаврил зузалт, кьурчIишиву кIидачIлай, жижара буллай буру жула даврил уртакь Аьшаева ПатIиматлухь ва ванил лас Аьшаев Нуруллагьлухь, ПатIиматлул уссу
ХIасан КIурухов
чIун дакъа ахиратравун лагаврийн бувну. Яраппий, ганан къабуллумур ганал душваран, душварал оьрчIан, кулпатран, махъминнан булуннав. Паракьат хьусса кIанттул ялув нур лахъаннав. Аьпа баннав. Амин.
Ккуллал райондалул азарханалул зузалт
Жу, Вихьуллал школалул учительтал ва дуклаки оьрчIру, кьурчIишиву кIидачIлай, жижара буллай буру жула уртакьнахь, школалул учитель Аьшаев Салимлухь, ванал ниттиуссу,
Шяъваннул арс КIуруххъал ХIасан
чIун дакъа ахиратравун лагаврийн бувну. Яраппий, ганан къабуллумур махъминнан, гъанссаннан булуннав. Паракьат хьусса кIанттул ялув нур лахъаннав. Аьпа баннав.
Вихьуллал школалул директор МахIаммадов Аьлил
