Буттал КIанттул цIанийсса Хъунмасса дяъвилуву ххувшаву ларсун 72 шин шаврин хасну щалагу билаятрай хьунни шадлугърал мажлисру, лахъа-хъун бунни дяъвилул ветерантал.
Май зурул 8-нний ЦIуссалакрал райондалул культуралул къатравугу лавайсса даражалий хьунни Ххувшаврил байрандалун хас бувсса мажлис. Гьашину ЦIуссалакрал райондалий Ххувшаврил байран хьунадаркьунни увагу кIия ветераннал – Аьлил Буттаевлул ва Аьвдулхаликь Аьлимовлул. Шиная шинайн ххялтIа дуклай дур дяъвилий талай бивкIминнал кьюкьри. ЦIуссалакрал райондалий, 72-мур Ххувшаврил байран хьунадакьин кьисмат къавхьуну, гьашину дунияллия лавгунни кIия ветеран.
Культуралул къатраву буллалисса шадлугърал мажлисрай гьуртту хьун бувкIун бия Хъун дяъвилул ветеран Аьвдулхаликь Аьлимов ва Венгриянавусса дяъвилул иширттал гьурттучи Ися Исакьов. Байрандалул ссупралух щябивкIсса ветерантуращал суратру ришлай бия дуклаки оьрчIру ва хъуними. Вайннал дурсса чувшивурттан лавайсса кьимат бишлашисса ихтилат бунни райондалул хъунама ХIажи Айдиевлул.
— Гьашину 72 шин бартлаглай дур Бюхттулсса Ххувшаву ларсун. 1941-1945 шиннардийсса дяъви ливчIссар жула тарихраву яла оьхIалмур ва яла чIявусса оь экьибувтIумур дяъвину. Цикссагу миллион халкьуннал оьрмурдацIа бувссар та дяъвилул. ХIакьину жула цинявннал буржри, Бюхттулсса Ххувшаву ласлай, хIат-хIисав дакъасса чувшиву ккаккан дурсса жула вирттал дакIний битаву, миннал чувшиврия ялун нанисса никирахь бусаву.
ХIурмат бусса ветерантал! Жу пахрулий буссару зул чувшиврия, ххарину буссару зу кунмасса инсантал жула чIарав бушиврия, зу бувмур тачIав хъамакъабитантIиссар, зун бивкIу бакъассар, — увкуна ХIажи Айдиевлул.
Райондалул бакIчинал ветерантуран буллунни арцущалсса конвертру.
Культуралул къатлул зузалтрал ветерантуран ва райондалул жяматран ккаккан дунни ххаллилсса концерт.
Хъиривмур кьини, Бюхттулсса Ххувшаврил байран дан, ЦIуссалакрал шяраваллил майданнив бувккун бия мухлукьат халкьуннал, кIюрххицIунма баллай бия халкьуннан ххира хьусса дяъвилул балайрду. ЦIуссалакрал райондалий мудангу Ххувшаврил байран дайдишай Гьамиящиял шяравусса Совет Союзрал Виричу Ханпаша Нурадиловлул гьайкалданучIа тIутIив дишаврийну. Гьашинугу, «БивкIу бакъасса полкрал» акция байбишин хьхьичI, ХIажи Айдиев, ванал хъиривчутал, Республикалул Халкьуннал Мажлисрал депутат Амирхан Амирханов бакIчисса делегация лавгунни Гьамиящил шяравун Виричунал гьаттай тIутIив дишин.
Ххувшаврил байрандалул сий хъиннура гьаз дуллай дур махъсса шиннардий аьдатравун дагьсса «БивкIу бакъасса полк» акциялул.
Ва акциялул ххишаланугу уттара дуккан дуллай дур вирттаврал цIарду, аьч дуллай дур жула тарихрал къучагъсса лажинтру. «БивкIу бакъасса полк» бачиннин, ванил гьурттучитурал, цинявппагу майданнив бувкминнал тIутIив дирхьунни Буттал КIанттул цIанийсса дяъвилия зана къавхьуминнан ва 1999 шиналсса дяъвилул иширттаву жанну дуллуминнан дирхьусса гьайкаллачIа.
Ххувшаврил ЯтIул ттугъругу бувгьуну, буттахъал, буттал буттахъал суратирттащал «БивкIу бакъасса полк» акциялул гьурттучитал, шяраваллил майданния байбивхьуну, шаннахъул километралул манзилданул ххуллийх «Дусшиврул» кьанив бувкIунни. Ялу-ялун чIяву хъанай бур «БивкIу бакъасса полк» акциялуву гьуртту хъанахъими. Гьашину ЦIуссалакрал райондалий акциялуву гьуртту хьунни 3 азарунния ливчусса инсантал – лакрал, чачаннал, яруссаннал миллатирттал агьлу.
Ххувшаврил байрандалий гьурттушинна дан мукунма бувкIун бия республикалул кьатIатуссагу бусравсса хъамал. Полкрал бакI дургьуну бия, ветерантал щябивтсса, дяъвилул чIумал кунмасса машина. Хъирив дастта дархIуну най бия мюрщиминная тIайла хьуну, оьрмулул бугьараминнайн бияннинсса инсантал.
Шиккугу райондалул культуралул къатлул зузалтрал ккаккан дунни концертрал программа.
Жагьилтурал дянив най бия личIи-личIисса спортрал бяст-ччаллу, миннуву ххув хьуминнан дуллай бия ЦIуссалакрал райондалул бакIчинал чулухасса бахшишру.
Гьарица байраннай кунна, ва кьинигу низам дуручлай, хъуннасса хъар лархъунни райондалул полициялул зузалтрал.
Ветерантал
Буттаев Аьлил ЖахIпарович.
Увну ур 1923 шинал Лакрал райондалийсса Ххалаккиял шяраву. Дяъвилийн лавгун ур 1942 шинал. Ва ивкIун ур 90-мур Битултрал полкраву минометчикну. Талай ивкIун ур Воронеж, Киев, Житомир, Каменец-Подольский, Варшава шагьрурду ххассал буллай. Дяъви къуртал хьуну махъгу, ванан багьну бур Прибалтика ва Белоруссия къачагътурал кьюкьрая тархъан буллан. Аьлил аьрая зана хьуну ур 1949 шинал.
Аьлимов Аьвдулхаликь Салимович.
Дяъви байбивхьусса чIумал, муххал ххуллул зузала хIисаврай, Аьвдулхаликьлун бронь дуллуну дур, ванал бригадагу муххал ххуллул аьралуннавух хIала бавкьуну бур. Та чIумал муххал ххуллул зузалт диян дуллай бивкIссар фронтран аьркинмур. Дяъви къуртал хьуну махъгу мадара шиннардий Аьвдулхаликь зий ивкIун ур муххал ххуллий. Мунияр махъ ванал чIярусса шинну дурну дур райондалул культуралул къатлул зузалану. Ми шиннардий ванал сакин бувну бур ххаллилсса художествалул самодеятельностьрал коллектив, хъиривва – театргу, цингу 1962 шинал халкьуннал театрданул цIа дуллусса.
Андриана Аьбдуллаева
Имара Саидова
