Ванал оьрму райондалулгу тарихри

ЧIярусса шиннардий Ккуллал райондалул КIулшивуртту дулаврил управлениялул хъунаману зий ивкIсса, 2-мур ЦIувкIуллал шяравасса Сапижуллаев АбутIалиб Рамазаннул арс жуятува лавгун шин бартлаглай дур.

Райондалул агьалинал хIакьинусса кьинигу ва бусраврай дакIнийн утлайнма бур.
Танисса оьрчIан кунма, АбутIалиблунгу ккавккун бур ккашигу-мякьгу, кIул хьуну бур захIматрал кьадругу. Дяъвилия мушакъат хьуну зана хьусса ппугу ччянива ивкIуну, мукьва мюрщисса оьрчI ца ниттил канихун багьну бур. Ниттин ичIува душ бакъашиву кIул хьун къабивтун, цимурца дуллай аьдат хьуну бивкIун бур уссурвал. Кулпатраву хъунама оьрчI ивкIун ур АбутIалиб. Уссурвал ччаннай бацIан баншиврул, ниттин кумаг буллай, хъуннасса хъар лахълахъимагу ивкIун ур АбутIалиб. ХIатта ичIаллил давурттаха цала дарсиралсса бувансса чIуннагу къадикIайсса диркIун дур. Школа къуртал бувну, вайми оьрчIру дуклан буххан нанисса чIумалгу, ванан багьну бур ятти-хIухчушиву дуллан. Школалий хьхьичIунну дуклай ивкIсса АбутIалиб хъинну къуману ивкIун ур дуккавриву махъун агьаврия. Амма дуккаврих гъира-шавкь ххишаласса ванал хьхьичIунсса хIасиллащал къуртал бувну бур Дагъусттаннал паччахIлугърал университетрал химиялул ва биологиялул факультет.
Итххявхсса, цалчинну дуклакисса жагьилсса пишакар зунгу тIайла увккун ур та чIумал республикалий ца яла сий думунин ккаллисса Хъусращиял школалийн. Цала даву кIулсса, инсантуращал авкьусса АбутIалиб кутIасса чIумул мутталий ххира хьунугу ур Хъусращиял жяматран. ЧIал къавхьуну, райондалул ОНО-рал тIалавшиндарайн бувну, АбутIалиб Сапижуллаев увцуну ур Ваччиял дянивмур даражалул школалийн. Хъусращиял школалул дуклаки оьрчIан АбутIалиб Рамазанович муксса ххира хьуну ивкIун урхха, оьрчIру ОНО-райн бувкIун, цала учитель зана итияра тIийгума бивкIун бур. АбутIалиб Рамазанович кунмасса учительтурал хIарачатрайну ва хъунмасса захIматрайнур та чIумалсса школалулгу, учительтуралгу, дуклаки оьрчIалгу сий диркIсса.
АбутIалиб чIал къавхьуну ивтун ур райондалул методикалул кабинетрал хъунаману. Ва даврийгу жагьилсса пишакар ччяни итталун агьну ур. ЧIал къавхьуну ванайн тапшур бувну бур райком КПСС-рал агитациялул ва пропагандалул отделданул хъунаманал къуллугъ.
1984 шинал АбутIалиб ивтун ур Ккуллал райондалул ОНО-рал хъунаману. Ванал каялувшиндаралу райондалул школарттал «Шинал школа», «Шинал учитель» тIисса конкурсирттай цимилгу цалчинсса кIантту бувгьуну, цикссагу бахшишру ларсун дур. АбутIалиб лайкь хьуну ур цикссагу хIурматрал грамотарттан ва наградарттан. Миннувух дур «РСФСР-данул просвещениялул отличник», «Дагъусттаннал лайкь хьусса учитель» тIисса бусравсса цIарду. Мукуна ва хъанай ур захIматрал ветерангу.
Пенсиялийн увккун махъгу АбутIалиб зий ивкIун ур райондалул тарихрал ва улча лахьхьаврил музейрал директорну. Ванал хIарачатрайну авадан бувссар райондалул музейрал тарих. АбутIалиб Рамазановичлул райондалул тарихраву кьариртссар цала бусравсса ва марцIсса цIа.
ИчIувагу АбутIалиб авкьусса, хIалимсса, тачIав кулпатран, оьрчIан, гъан-маччанан къаччан бикIан къабувсса инсан ия. Ванал кулпат, Айзанат, хIакьинусса кьинигу бур Ваччиял школалий байбихьулул классирттаву дарсру дихьлай. Айзанатгу мукунма бусравну ва хIурмат-кьиматрай бур дуклаки оьрчIал ва шяраваллил жяматрал дянив.
Вайннал эбратранну тарбия бувну бур мукьва душ. Хъунма-хъунмур душнил, Ларисал, язи бувгьуну бур буттал пиша.
— ЛяличIину ххирая буттан хъамал, ччаву дусса ия гъан-маччанах. Анавар къауккайсса, учин-бусан кIулсса ушиврийну ччя-ччяни уцайва жяматрал маслихIат ккаккан аьркинсса кIанттурдайн. Жу, душругу, хъуни хьуссару гьарца ишираву муная эбрат ласлай. Пахрулий икIайва мукьва душ къатлул бувну, миннал ласурваврал маччаминнащал цукунчIавсса тIааьндакъашиву къархьуссар тIий. Бутта гьарца ишираву дакIний агьай, хъамакъаитай, — тIий бур Лариса.

И. Саидова