Вай бигьалагай гьантрай билаятрал агьамми телеканаллай ккаккан дурсса ца яла сийлийми передачарттаву жулла республикалий хъанахъимуния ва жула шиччасса халкьунная буслай бивкIунни.

Пашманми хаварттацIун ххарисса, ххуйсса хаварттугу чIявуя.
Масалдаран, Хъярч-махсаралул кьини, апрельданул 1-нний, Андрей Малаховлул «Аффтор жжет» тIисса передачалий чIавасса, утти «интернетрал чаннацIуку» хьусса МахIачкъалалиясса Мадина ккаккан бувунни. Цаппара зурдардил хьхьичI видеолий цила учительница Тамара МахIмудовнахь, цув цамур классравун магьанбара тIий, миннат буллалисса душнийн передачалул сакиншинначитурал оьвкуну бивкIссар мартрал гьантрай.
Хъиривмур кьини , апрельданул 2-нний, «МИР» телеканалданий «Аьжаившиву вайннал» тIисса передачалий ккаккан дурунни жула Дагъусттаннал миллатирттал дикIуя дайсса дукрарду ва жула шиккусса дикIухсса эшкьи. Телеканалданул журналистътурал, бувсунни дурцIу дикI дайни, ми кьакьан дайни, жула халкьуннал байсса захIматрая, ми дикIущалсса дукрардая ва ми дайсса куццуя.
Мува кьини Цалчинмур каналданийсса «Цинявннаяр ххуйсса» тIисса Максим Галкиннул передачалийгу сахIналийн бувккунни МахIачкъалаллал 8-сса магьирлугърал школалул тарбиячитал, «Молодость Кавказа» ансамбльданул яла мюрщими къавтIалт. Вайнналгу гьавас бутанну ккаккан дурсса «Лезгинкалийну» кьакъабагьавайсса тамашачитурал хъатру хIалал дурунни.

З.АьбдурахIманова