Апрельданул 3-нний ДР-лул БакIчи Рамазан АьбдуллатIиповлул каялувшиврий хьусса оператив батIаврий ххал бивгьунни ларгсса нюжмардий шагьрулул базаллувун цIу дагьаврин хасъсса масъала.
МахIачкъалаллал Ирчи Къазахълул кIичIиравусса базаллувун цIу дагьаву Республикалул БакIчинал ккалли дунни апатIсса иширан. Ганал пикрилий, ва иширал жаваб дулун аьркинссар балжисса инсантурал.
«Гьарца базаллул дур цила ялувсса компания, бур директортал, миннал дулун аьркинссар машлул объектру дуруччаврил жавабгу. Жува цимилагу хIарачат барду миннал давурттаву дахханашивуртту дуван, ттизаманнул законнацIун ва нормардацIун дакьин дурну, амма цивппа машачитал ва базардал хъуними къарши буклай бия дахханашивурттайн. Хьунни апатIсса иш, мунияту хъуслицIа хьуминнан арцуйнусса кумаг буван аьркинссар, цалчин — ишбажаранчитурал ляркъумуних яхъанахъиминнал ва миннал хъус ядаврил жаваб дуллалиминнал. Ваниягу, цайми базаллаватугу республикалул бюджетравун къачIярусса арцу дучIайва, амма паччахIлугърал цалла даву биттур дуван аьркинссар. Мунийн бувну чIирисса чIумул мутталий ДР-лул Мюхчаншиврул советрай сакин бантIиссар му иширан хасъсса комиссия, мунил ххал дувантIиссар Дагъусттаннал хъунисса базардал тагьар», — увкунни Рамазан АьбдуллатIиповлул.
МахIачкъалаллал мэр Муса Мусаевлул бувсунни цIу дагьаврийну зараллу бивсса инсантуравату ляличIину кумаграх мюхтажминнан арцуйнусса лахъаву дуллантIишиву.
БатIаврий мукунма ххал бивгьунни кьай духхай машинарттал заллухъруннал рязи бакъашиврул масъалагу. Ми рязи бакъа бур «Платон» системалул тарифру лахъ баврия.
«Жу хIарачат буллай буру ва экономикалул бутIуцIун кабакьин, муданна биттургу дулланну щупиртурал закондалийнусса тIалавшинну. Амма бур Дагъусттаннай тагьар оьлукъин дуллалисса ламмамталгу, жу миннал тIимунийх къагьантIиссару. Мукунсса закондалийн къаршисса иширттал Дагъусттаннан зарал биян буллалиссар. Агарда инсантурал налогру дуллай бухьурча, цалла даву сияхIрайн ларсун духьурча, закондалул ххуллий зий бухьурча, жу миннан кумаг буллан аьркинссар гьарца кьини. Миннахун бахчилангу къабитанну. На хьунаавкьура Аьрасатнал ГИБДД-лул каялувчинащал, Дагъусттаннал «дальнобойщиктурал» цалла хъус духхайни захIматшивуртту къахъананшиврул», — увкунни Рамазан АьбдуллатIиповлул.
Масъалалул хIакъираву ихтилат бунни ва бутIуй каялувшиву дуллалисса ДР-лул ХIукуматрал Председательнал хъиривчу Шамил Исяевлулгу. Мунал бусаврийн бувну, масъала чулийн буккан бавриха зий бур налогирттал органнал ва Госавтоинспекциялул вакилтал.
ХIадур бувссар ХI. Аьдиловлул
