«Единая Россия» партиялул председатель Дмитрий Медведевлул халкь кьамул бай къатлуву Дагъусттаннай АьФ-лул ПаччахIлугърал Думалул депутат Юрий Левицкийл инсантал кьамул бунни.
МахIачкъалалиясса I группалул инвалид Айпери Дашдамировал тавакъю бунни ганил кулпат бух бувксса къатлувату цамур кIанайн бизан баврин кумаг бан. Депутатнал цала кумагчинайн тапшур бунни ДР-лул Къатри даврил, архитектуралул ва ЖКХ-лул министерствалийн чагъар чичин масъала щаллу баврил хIакъираву.
МахIачкъалалиясса Руслан Кьадыровлул тавакъю бия, ганал ижаралий лавсъсса кьай даххай кIанттун хасну судрал бувсса хIукмулул хIакъираву. Юрий Левицкийл бувсунни ганахь, федерал закондалийн бувну, депутатнахь ихтияр дакъашиву судрал иширттавун хIала ухлан, судрал хIукму баххана бан шайшиву так ганияр лаваймур даражалул судраща.
МахIачкъалалиясса Валентина Зайнулаьбидовал депутатнахь тавакъю бунни, политикалул репрессиярттайну зарал бивмур хIисаврай, къатта ласун кумаг бан. Юрий Левицкийл цала кумагчинайн тапшур бунни ДР-лул ЗахIматрал ва социал иширттал министерстволийн чагъар чичин Зайнулаьбидовал аьрза ххалбигьаврил хIакъираву.
Циняв цачIанма бувкIминнащал Юрий Левицкийл гьарта-гьарзасса ихтилат хьунни. Депутатнал бувсунни миннал заявленияртту бикIан тIий бушиву региондалул инсантал кьамул байсса къатлуву контрольданий.
Инсантал кьамул бувну махъ Юрий Левицкий хьунаавкьунни уттигъанну увчIуну ивкIсса Жагьилтурал парламентрал председатель Сергей Никитиннущал.

ХIадур бувссар ХI. Аьдиловлул