Апрельданул 18-нний Ставрополлал улклуй Дагъусттан Республикалул Кьинирдал лагрулий региондалул БакIчи Рамазан АьбдуллатIипов ивунни республикалул халкьуннал касмурдал ва Дагъусттаннал чичултрал луттирдал выставкалийн.Выставка дурну дия Ставрополлал М. Ю. Лермонтовлул цIанийсса элмийсса библиотекалул къатраву.
Вава майданнив ккаккан дурну дия республикалул приоритетсса проектругу, туристшиврул каширдугу.
Рамазан АьбдуллатIиповлул бусаврийн бувну, Дагъусттаннал хIарачат буллай бур чIаххувсса регионнащал хIала-гьурттусса давуртту дуллан, миннувух – туристшиврул бутIувугу. «ЖучIа дур ххуйну хIадур дурсса инфраструктура, мунийну бюхълай бур лядуккан дуван экотуристшиву, авлий буккаврил ва чавахъру бугьаврил туристшиву, хъамал кIул буллан Дагъусттаннал миллатирттал багьу-бизулущал ва аьдатирттащал. ЖучIа дур ляличIисса тIабиаьтрал гьайкаллугу: бархан «Сары-Къун», Сулакьуллал ратI, Хучниннал жюружани, Самурдул хIалу, зунттал лыжардай бигьай кIанттурду, альпинистътурал ххуллурду. Дагъусттан бур аьчухсса ссавнилусса багьайкунсса музей», — увкунни Рамазан АьбдуллатIиповлул. Дагъусттаннал БакIчинал мукунма бувсунни республикалий душиву 6,5 азарда культуралул ва архитектуралул гьайкал, миннуватусса чIяруми ларсун душиву щаллагу дунияллул ЮНЕСКО-лул ирсирайн.
ХIадур бувссар

ХI. АЬДИЛОВЛУЛ