Ва футболданул сезондалий жучIава, «Анжи-ареналий», «Крылья Советов» ххув хьунни МахIачкъалаллал «Анжи» командалияр, 3:1 счетрайну. Жулла командалул къапулувун цалчинмур гол муттаэтурал бавкьунни тIуркIулул 9-мур минутIрай, Сергей Корниленкол архниява бивщуну.

Хъиривмур гол бавкьунни, штрафнойрал ххуттачIату архниява бивщуну, Георгий Зотовлул. ТIуркIулул 1-мур бутIа къуртал хьунни 2:0 счетрайну. Бигьалавгун майданнив бувккун махъгу жулла командалун тIайлабацIу хъанай бакъая.ТIуркIулул 64-мур минутIрай Жанни Брунол ттуп тIайла бувккунни Кристиан ПаскуаточIан, ганалгу, гъансса кIанавату бивщуну, ттуп бавкьунни жулла командалул къапулувун. Счет хьунни 3:0. Жулла командалуща бювхъунни так ца гол бакьин, мугу – пенальтилия: ттуп щунни муттаэтурал командалул футболчи Сергей Божиннул канийн.
«Крылья Советов» ххув хьуну махъ турнирданул таблицалий 13-мур кIанай хьунни.

ХI. Аьдилов