Ларгсса нюжмардий МахIачкъалалив, Республикалул этнический культуралул центрданий, тIивтIунни оьруснал культура ххираминнал клуб – «ЯтIул мурцIу». Ва даву сакин дурну дия Республикалул оьрус мазрал ва культуралул центрданул.
Клубрал цалчинсса батIаву хас дурну дия цинявннаннагу ххирасса хIачIия – чяйлуцIун дархIусса аьдат-эбадатирттан.
— Пукьлуву ятIулсса мурцIу мудангу ккаллину бивкIссар яла бусравмур, яла кьиматраймур кIанттун, микку лархъун диркIссар иконарду ва миннул лув щябитайсса бивкIссар хIурмат лавайсса, бусравсса хъамал. Гьарца Оьрус мазрал ва культуралул центрданийн увкIмагу жун яла ххирама, яла бусравма хъамаличуну икIантIиссар, — увкунни, мажлис тIитIлай, центрданул директор Лариса Кукановал.
Мажлисравух гьуртту хьун бувкIун бия ДГУ-рал юридический факультетрал студентътал, республикалий ххуйну кIулсса жяматийсса ишккаккулт.
Мажлис най бия самоварданул ва чяйлухунсса нахIу-нацIушивурттал чIюлу бувсса хъунмасса столданух, ца хъунмасса бавкьусса кулпат кунма, цинявппагу щябивкIун. Чяйлухун бавтIминнал гъирарай вичIи дирхьунни, чяйлул церемониялуцIун дархIуну, оьруснал, мукунна цайми-цаймигу миллатирттал цуку-цукунсса аьдатру, хIакъи-хIисавртту дуссарив, къакIулну бивкIминнан кIул хьунни, кIулминнан дакIнийн багьунни китайнал монахтурал чяй, хъин байсса хIачIия хIисаврай, хIачIлай байбивхьушиву жулла эралийннин цикссагу шиннардил хьхьичIва, чяйлуцIун дархIусса цалчинсса чичрурду тIурча, най душиву 12-мур аьсрулия шиннай, Аьрасатнаву тIурча, 17-мур ттуршукулия шиннай ххирану душиву чяй. Аьрасатнавун чяй цалчинна-цалчин ларсун бувкIун бур 1462 шинал Китайнава, амма му хIачIиялух къулагъас къадурну дур. Анжагъ 1665 шинал паччахI Алексей Михайловичлул чирчуну дур Китайнащалсса кьутIи, цийн бувнугу Китайнава Москавлив чяй ххилан бивкIсса.
Самовар, оьруснал миллатрацIун дархIусса накьичру дусса тIахIни-кIичIу, ххачлил накьичрай щаршсса калихьуртту дусса тIаннул столданух чяй хIачIлай щябивкIни, мяйжаннугу оьруснал шяравусса ца къатлуву бусса кунмасса асарду хIасул хъанай бия.
Гихуннайгу «ЯтIул мурцIув» дуллантIиссар личIи-личIисса батIавуртту, хьунабакьавуртту, ххал бигьлантIиссар оьруснал миллатрал багьу-бизу, халкьуннал аьдатру, бартдигьлантIиссар личIи-личIисса проектру ва акциярду.
Бадрижамал Аьлиева
