Дагъусттаннал элмийсса центрданул Тарихрал, археологиялул ва этнографиялул институтрал машрикь канихчичрурдал архив цифрардал форматрайн буцаврил даву дайдирхьунни.

Ва даву дуван бакIрайн лавсунни Зиявуттин МахIаммадов бакIчисса «Пери» тIисса ихIсандалул фондрал, «Культуралул ирс- ххазина» тIисса дунияллул халкьуннал программалул лагрулий. Ва программа 2015 шиная шиннай, испаннал Factum Foundation тIисса фондращал уртакьну, ттизаманнул технологиярттал кумаграцIух кьиматрайсса архивру ябувавриха зузисса программа дур. Аьрасатнал жагьилтуран аьвзал-заманнул культуралул ва элмулул фонд ядаву мурадрай чялишну зий дур. Дагъусттаннай дянивну ххюцIалазарунниха ливчусса машрикьуллал канихчичрурду цифрардал форматрайн дуцин дакIний бур. Яла му архив щаллагу дунияллул аьлимтурал итталугу бикIантIий бур.

П. Рамазанова