Мартрал 29-нний Дагъусттан Рес­публикалул БакIчи Рамазан Аьб­дуллатIипов ивунни Хайдакьуллал райондалийн. Мажалисуллал шяравун гъансса ца хъув ванал щунни Цалчинсса хъарас. Мунийну республикалий дайдирхьунни шяраваллаву хъунил давурттал чIун.

Фестивальданий гьуртту хьунни 1-9-ми классирттал дуклаки оьрчIру. Цала-цала класс­рал каялувчитуращал вайннал хIадур дурну дия экологиялул масъаларттан хас дурсса программартту.

Экологиялул шинал лагрулий баян бувну бур щалагу Аьрасатнал конкурс «Щюллисса планета». Ва конкурсрал кIанттул этап хьунни ттигъанну Лакрал райондалий. Конкурс хьунни бутIра-бутIрайх бавчIуну: КIундиннал школалий – ВицIхъиял махIлалийсса школардал дянив ва ШавкIуллал школалий – лагма щархъал школарттал дянив.

Ттигъанну Лакрал райондалий хьунни аьдатравун багьсса Интнил байрандалун хас бувсса волейболданул бяст-ччал. Бяст-ччал шайссар гьарца шинал райондалул спорткомитетрал сакиншиндарайну.

Шадлугърал даражалий хьунадаркьунни Интнил байран ЦIуминалийсса Чапаевкаллал шяравусса «Солнышко» садикрай. Ва кьини садикрайн оьрчIал нину-ппу бувкIун бия, жура-журасса бартри-гургригу дурну.

Мартрал 14-нний МахIач­къалалив хьунни Аьрасатнал ветерантурал жяматийсса организациялун 60 шин ва Дагъус­ттаннал ветерантурал организациялун 30 шин там шаврин хас був­сса пленум.

Укунсса цIанилу мартрал 20-нний Ккуллал шяраваллил оьрчIал багъраву хьунни райондалийсса оьрчIал ряхвагу багърал тарбиячитурал дянивсса конкурс. Конкурсрал мурадну бия оьрчIал тарбиячинал касмулул сий гьаз даву, цалла давриву мунал ишла буллалисса кьяйдарду цаймигу тарбиячитуран кIул баву.

Мартрал 18-нний Ккуллал райондалий, Ваччиял школалий, хьунни дуклаки оьрчIал дянивсса, «Белая ладья» тIисса шахматирттай буккаврил турнир. Турнирданул сиптачину бия райондалул УО.