Фестивальданий гьуртту хьунни 1-9-ми классирттал дуклаки оьрчIру. Цала-цала класс­рал каялувчитуращал вайннал хIадур дурну дия экологиялул масъаларттан хас дурсса программартту.

А. Аьбдуллаева
Ва мероприятиялул сакиншинначи бия гимназиялул завуч Мариям Буттаева. Ванил уттинингу ЦIуссалакрал гимназиялий цикссагу ххаллил­сса давурттив дурссар. Гимназиялул къатравун буххайхтува, чIалай бия ва школалий оьрчIру итххяххан буван учительтурал хъунна­сса даву дуллай бушиву. Зал чIюлу бувну бия экологиялун хасну оьрчIал дирхьусса суратирттал ва плакатирттал. ОьрчIащал фестивальданийн хIадур хъанай, хъунмасса захIмат бивхьуну бия нитти-бутталгу. Дурурххуну дия оьрчIал хIадур дурсса проектирдацIун даркьу­сса яннарду.
Фестивальданул жюрилуву бия гимназиялул учительтал: Нахаев ХIамид, Гадачиева ХIаписат, «Заманалул чIу» кказитрал корреспондент Чугуев Сулайман.
ОьрчIал проектирдан кьимат бишлай бия 5 номинациялий: музыкалул ва драматургиялул искусство; темалул агьамшиву; яла ххуймур презентация; яла ххуймур сурат; проектрал ляличIишиву.
Литературалул произведениярттавасса парчри, тIабиаьт дуруччаврин, жяматийсса кIанттурдай марцI-чапалшиву дуруччаврин хас бувсса ххаллилсса композициярттащал­сса авадансса программа кка­ккан дунни дуклаки оьрчIал. Фестивальданий гьуртту хьусса оьрчIру, буниялагу, итххявхсса, гьунар бусса бия.
Жюрилул хIасиллу дурну, хьхьичIун бувксса оьрчIан буллунни дипломру.