Апрель зурул 24-нний, МахIачкъалаллал аэропортрай байбивхьунни «Георгиевская ленточка» тIисса акция. МахIачкъалаллал аэропортрая лехлаххисса цинявппа пасажиртурайх бачIлай байбивхьуну бур акциялул лентарду.
Георгиевская ленточка – хъанахъиссар Ватан душманная дуручлай бивкIминнал аьпа абад буллалисса, Бюхттулсса Ххувшаву ларсуминнахь барчаллагь тIутIисса лишанну.
Шиккува кIицI лаган, Ххувшаврил кьини МахIачкъалаллал аэропортрал ВИП –заллу уква ишла бан бюхъантIиссар Хъун дяъвилул гьурттучитураща ва миннащал архIал наниминнаща.
ХIакьину МахIачкъалаллал аэропортрая ссятрал мутталий лехлай ур 200 пассажир, дунияллул кьатIувсса рейсирдайнгу ссятрал мутталий лехлай ур 60 инсан.
2016 шинал февраль зуруй аэропортрай буллай байбивхьуну бур 8000 кв метра дусса, 190 пассажир ссятрал мутталий итаакьин бюхъайсса цIусса терминал.
МахIачкъалаллал аэропортрая гьарица кьини Москавлийн лехлай дуссар 10 –дирсса самолетру. Дуссар Санкт-Петербурглив, Сургутлийн, Къазахсттаннайн, Туркнавунсса рейсругу.
Май зурул 23-нний МахIачкъалаллал аэропортрай дайдишинтIиссар Ростоврайн, Сочилийн ва Минводылийнсса рейсру.

И.Саидова.