Апрельданул 3-нний «ТIиртIусса власть» проектрал лагрулуву республикалул журналистътурал суаллахьхьун жавабру дуллунни ДР-лул финансирттал министрнал кIанайма Юнус Сяъдуллаевлул.
Ганал ихтилатрал хъунмур бутIа бия махъва-махъ хьусса парламентрал сессиялий Дагъусттаннал бюджетраву хьусса дахханашивурттал хIакъираву.
Юнус Сяъдуевлул бусаврийн бувну, махъсса шиннардий бюджетрал доходралмур бутIа хъун хъанай бур, дянивну лавсун республикалул бюджетравун налогру дучIан даву гьарза хьуну дур 15,2 процентрал. Кьамулгу дурну дузрайнгу дуккан дуллай бур «Экономика чаннайн дуккан даву» (Обеление экономики) тIисса приоритетсса проект.
2017 шинал бюджетравунсса доходру гьарза хьуссар 117,5 процентрал, 2016 шинал вара чIумух бурувгун.
Федерал даражалий дахханашивуртту хьуну махъ, республикалиятугу тIалавшинну дурну дур газрал сетирдал инвентаризация дуван ва бюджетрал харжлугърал оптимизация дуван. 2017 шинал тамансса дахханашивуртту хьуну дур Аьрасатнал субъектирдан дотациярду дулаврин шартIирдан хасну ва ми биттур къадаврийну хьунтIисса зараллан хаснугу.
Мунияту ДР-лул Халкьуннал Мажлисрал мартрай хьусса сессиялий тIайла дацIан дурссар республикалул бюджетрал доходру ва харжлугъру.
Министрнал кIанайманал журналистътуращалсса ихтилатраву гьаз бунни агьалинан выплатартту булаврил масъаларттугу. «Социал выплатартту (оьрчIал дукиялухсса, дарурттахсса ва цаймигу) бюджетраву чан къадурссар, ялунгума, дукIуминнуяр чIяру дурссар», — увкунни ганал.
Сяъдуллаевлул личIину бувсунни цаппара категориялул инсантуран хIаллихшинну даврил ва оьрчIал дукиялухсса харжлугърал масъаларттая.
Ганал бусаврийн бувну, гьашину цаппара категориялул инсантуран хIаллихшинну дувансса арцу ккаккан дурну дур 103,4 процентрал гьарзану, коммунал хIаллихшинну шяраваллавусса пишакартуран – 107 процентрал, оьрчIал пособияртту – 125,5 процентрал лахъ бувну. Му бакъассагу, тамансса ххи дурну дур оьрчIал дукиялухсса харжлугъ – 121,6 процентрал, дарурттахсса харжлугъ – 190,8 процентрал.
Республикалий харжирдансса арцу бюджетраву ккаккан дурну дур 39,6 млрд. къуруш (дукIу 38,4 млрд.), ягу цинярда харжлугъирттаву 38,3 процент «Майрал» хIукмурду дузрайн буккан баву мурадрай итадаркьуну дур 16 млрд къуруш.
ХIасан Аьдилов
