Гьашину мартрал 14-нний Москавлив хьуну дур АьФ-лул ПаччахIлугърал Думалувусса «Единая Россия» партиялул фракциялул батIаву. Ва батIаву хас дурну дия билаятрал агропромышленностьрал комплексрал масъаларттан. Ххал бивгьунни аграрий бюджетрал масъалартту, АПК-ран арцу гьарзану итадакьин бюхъаву, паччахIлугърал кумаграл давуртту, шяраваллаву культура хьхьичIуннай даву.
ЧIал дакъа хъуру дугьаврил давуртту дайдихьлай душивугу хIисавравун лавсун, ляличIисса къулагъас дурну дур хъунил давурттайн хIадур шаврих – хъудугьултрал ва фермертурал хозяйствартту ГСМ-лал (ччуччиялул), оьргъашиврул, гьаннарал, шяраваллил хозяйствалул техникалул щаллуну душаврих.
БатIаврий ихтилатругу бувну, депутатътурал суаллахьхьун жавабругу дуллунни Аьрасатнал Федерациялул шяраваллил хозяйствалул министр Александр Ткачевлул, «Россельхозбанк» АО-рал правлениялул председатель Дмитрий Патрушевлул ва «Росагролизинг» АО-рал гендиректор Валерий Назаровлул. Мукунсса фракциялул батIавуртту утти аьдатравун дагьну дур, тикку ххал бигьлагьисса масъалартту бур промышленностьрал ва транспортрал хIакъиравусса, 2017 шинал федерал бюджетрал ва пландалийн лавсъсса 2018-2019 шиннардил бюджетрал хIакъиравусса ва цаймигу масъалартту.
Масъала ххал бигьаврил хIасиллая буслай, ПаччахIлугърал Думалул депутат, «Единая Россия» партиялул регионнал дянивсса координациялул советрал каялувчинал хъиривчу Юрий Левицкийл чIурчIав дунни, цIанасса ппурттуву бакIлахъиялул мюхчаншиву щаллу даврил стратегиялул мяъна душиву. Мунияту ва масъала цин багьайсса куццуй щаллу буллай бур паччахIлугърал.
