ХЪИН БИКIАВУ
Германиянал канцлер Ангела Меркельлул уттигъанну Египетнаву, тайннал президент Аьбдул-ПаттахIас-Сисищалсса хьунабакьаврий, бувсунни Африканал билаятраясса ва дяъвилул цIарая ливхъун нанисса билаятирттаясса л­ихъачалтран кумагран 250 миллион доллардал булунтIишиву. «Германия хIадурссар арцуйнусса кумаг буллан Египетнан, так лихъачалт­ран къулайсса оьрму дузал бувара тIисса тIалавшиннар жул дусса», — увкунни Меркельлул.

КьатI б уллалира барцIру
Ссибирнаву, Ямалалий, аьдатру ядурсса мюрщи миллатирттан грант­ру дуллансса хIукму бувну бур. Масалдаран, тундралийсса пишакартуран, халкьуннал касмурдай зузиминнан, канил пагьмурдал заллухъруннан 200 азарда къуруш дуллан тIий бусса бур. Авчитуран ва чавахъру бугьултран мяй-мяйазарда къуруш пособиялун дуллан тIий бур, мукунма хъун дурну дур барцIру кьатI бувминнан дуллансса арцул фондгу.

ЦА ХЪАМИТАЙПАЛУЛ
БУВНУ БУР 69 ОЬРЧI
Палестиннай аьпалухьхьун лавгун бур дунияллий яла чIявусса оьрчIру бувсса хъамитайпа. МукьцIалла шинай оьрму бувтсса палесттинщарссанил, кIинничалт, шанничалт буллай, 69 оьрчI бувну бур.

Аьзизмунин —
ччимур базу
Италиянаву, Апеннинай, 52 шинал оьрмулувусса адаминал, Хъаннил байрандалул бахшишран, 44 шинал оьрмулувусса цала аьзизмунин цалва ччарлу буллуну бур. ХIакинтурал бувсмунийн бувну, операция ххуйну хьуну бур.

МУХIУТТИНТУРАЙ
ДИРХЬУССА КЪАДАГЪА
Израилнал парламентрал кьамул дурну дур «МухIуттинтурал хIакъиравусса закон». Ва закондалийн бувну депутатътурал къадагъа дурну дур чIу лахъ бай затирттавух лахъну азан тIун, азандалул бюх­ттулсса чIу лагма-ялттуминнахун бахчилай бушиврул хIучча цIакьлин бувгьуну. Мяйжанссар, ва закон кьамул даврий рязи бакъассагу депутатътал бур, му бусурман агьулданул ихтиярду ссуссукьу дувавур тIий.
* * *
Утти Эстониягу, ЛатвиянацIун ва ЛитванацIун бавкьуну, «совет оккупациялухлусса» компенсация тIалав дуллан ччай бусса бур. Эстониянал Минюстрал хъунама Урмас Рейнсалу ур Совет Союзравун хIала шаврийну цалва билаятран хъунмасса зарал хьуссар, му зарал Аьрасатнал лахъан аьркинссар тIий.

ЯЛА БАКIРАЛ ХХУЙМУР ДУШНИЛ ЗУМАТУ
Американал Калифорния штат­рал хъуниминнал «Шинал хъамитайпалул» конкурсрай пакисттан душ Мойна Шаик ххув хьушиву баян бунни. Ларгсса шинал Мойна чIявусса инсантуращал хьунабавкьуну бур, ислам диндалия хIакьмур буслай. Сайки ттуршунниха ливчу­сса хьунабакьавурттай мунил, исламрал хIакъиравусса суаллахьхьун жавабру дуллай, ислам ххуймунийн, хъинмунийн оьвтIутIисса дин душиву бувчIин буллалисса ихтилат­ру бувну бур. Штатрал хъуниминналгу мунил хIарачатран кьимат бивщуну бур.

Маз къакIулнан аьрщи дакъассар
Латвиянаву халкьуннал хозяйствалулсса буллалисса комиссиялул хIукму бувну бур латыш маз къакIулнан аьрщи къадахлан. Латвиянал хъудугьулт хьхьичIва парламентрайн аьрзирай бувккун бивкIун бур, ххирану дахханну аьрщи машан ласласиминнахьхьун ва ишла къадуллалинахьхьун аьрщи дулаврин къадагъа дувара тIий.Тайннал закондалийн бувну, Латвиянаву къаяхъанахъисса кьатIаллил билаятирттал инсантуран аьрщи да­ххан укуннагу къадагъа дусса дур. Утти гъалгъа буваннувагу латыш маз лахьхьин аьркинну бусса бур, чIири-хъунсса аьрщарал заллу хьун ччарча.

ЦИ-БУНУГУ ЛАХЬХЬИН ТАЧIАВГУ КЪАЧIАЛССАР
Дуклан тачIавгу къачIалссар. Къиргъизнал паччахIлугърал университетрал аспирантуралувун дук­лан увххун ур 80 шинавусса Тологон Байшеев. Ва филологиялул элмийсса давурттал лу итабакьин хIадур хъанай ивкIун ур, муаьллимтурал мунан маслихIат бувну бур элмурдал кандидат хьунсса диссертация дуруччин. Студент-хъуначунал диссертациялул темагу дур къиргъиз мазрал словарьдануцIун ва студентътурансса методикалуцIун дархIусса. Цила чIумал Байшеев, Къиргъизнал университетравун кьамул къауллай, азурда увну ур, мунал ппу революциялийн къаршиминнавух ивкIссар тIий. Шанна шинай кьамул къауварчагу, лакъавхIуну, хъиривмур шинал дук­лан увххун, университет къуртал бувну бур мунал. Школалий дарсругу дихьлай, фермернугу зий ур. Ва 11 оьрчIал ппугу ур.

Яла кIума оьрчI
Китайнаву Сиань тIисса шагьрулий увну ур сайки 7 кило дусса , загълунсса оьрчI. ХIакинтурал бувсмунийн бувну, ва тайннал оьрчIбай къатлуву увсса яла кIума оьрчI усса ур. Гиннессрал рекордирттал луттирайн бувну, уттинин дунияллий бувцири оьрчIаву яла кIуману ивкIун ур 1879 шинал Американаву увсса 10 кило дусса оьрчI. Мяйжанссар, му оьрчI 11 ссятрава къуртал хьуну ур. Яла кIуми оьрчIру бувайсса билаятну ккаллийну бур Китай.
ХIадур бувссар
П. Рамазановал