Ххачпарас диндалул агьулданул хьунадакьайсса байраннаву ца яла чаннамур, ца яла нахIумур байран духьунссар Масленицалул байран, кIинтнил ахирданий, интнил гьантрачIан гъанну хьунадакьайсса. Масленицалул байран лахъи лагайсса нюжмардул дянив бувайхьунссар ва букайхьунссар щалла шинал лахъишиврийнияр чIявусса ххюлтIурду, личIи-личIисса журардал. Масленицалул байран хьунадаркьунни Республикалул оьрус мазрал ва культуралул центрданийгу.
Бадрижамал Аьлиева
Масленицалул байран хьунни МахIачкъалаллал епархиялул чIарав бацIаврийну. Ва ххуллухсса шадлугъ цурдагу хьунни МахIачкъала шагьрулул Успенский кафедрал соборданул ДПЦ-даний (Духовно-просветительский центр). Муданма кунма, байран кIицI лаган кумаг буллай бия Оьрус мазрал ва культуралул центрданул волонтертал – ДГУ-лул филологиялул студентътал.
Байрандалувух гьуртту хьунни шагьрулул школардал дуклаки оьрчIру, арт-группа «Непоседы». Миннал увкунни частушкарду, оьруснал халкьуннал балайрду, бувккунни оьрус миллатрал аслийсса тIуркIурдай. Байран хьунни тяхъасса, муния рязину ливчIунни жагьилтал ва бугьарами. Байрандалийн бувкIсса мюрщи оьрчIругу ххарину бия цанна дуллусса бахшиширттая. ОьрчIал филармониялуву ккалаккисса, Республикалул оьрус мазрал ва культуралул центрданул дуллалисса гьарцагу давривух гьуртту шайсса, гьунар бусса чIава балайчи Алина Барановал увкунни балайрду.
Гьай-гьай, ци Масленицар ххюлтIукарду бакъасса: ва кьини цинявнналагу гъирарай бувкунни личIи-личIисса журардал ххюлтIурду.
