Лариса ХIажиева,
Дагъусттаннал халкьуннал артистка.
-Ларгсса нюжмардий на гьуртту хьура Москавлив Кремлилул Дворецраву хьу­сса «Террорданийн къаршисса музыка» тIисса проектрал лагрулий дурсса, хъуннасса агьамшиву дусса концертрай.

Хас дурну дия концерт декабрь зурул 19-нний Туркнаву оьрмулуцIа ув­сса жула посол, Аьрасатнал Виричу Андрей Карловлул аьпалун. Террорданийн къарши­сса музыкалул концертрал сакиншинначи ия цIанихсса режиссер, журналист, жяматийсса ишкка­кку, дипломат, «Благо» тIисса дунияллул халкьуннал культуралул ва социал гуманитариялул хIала-гьурттушиврул идаралул президент, «Миррос» миллатир­ттал группа хIасул бувсса, хъинну гьунар бу­сса музыкант Фарид Каюми. Концертрай гьур­тту хьунни Аьрасатнал Федерациялул лайкь хьусса артистътал Нина Шацкая, Екатерина Гусева, пианистка Екатерина Мечетина, Сосо Павлиашвили, Туркнавасса ва личIи-личIисса билаятирттаясса машгьурсса музыкантътал ва балайчитал.
Фарид Каюмил бусаврийн бувну, террорданийн къаршисса музыкалул проектрал мурад бия дунияллий дакьаву, миллатир­ттал дянив аслахIшиву дуру­ччаву. Мукунма концерт сакин даврил чIарав бавцIунни Аьра­сатнал МИД ва Москавуллал хIукумат. Залдануву щябивкIун бия Александр Карловхъал кулпат, Москавуллал хIукумат ва чIявусса цаймигу хъунисса хъамал. Концертрайн­сса билетругу уквасса бия, шикку гьуртту хьусса артистъталгу уква бувкIун бия. ЧIявусса бия музыкантътал ва балайчитал ва концертрай гьуртту хьун ччай бивкIсса.
Дагъусттан Республикалул чулуха укунсса даражалул концертрай гьуртту хьун ттуйнма оьвчаврия на хъинну ххарину бура. Кремлилул сахIналия учав нагу лакку балай. Концерт цурдагу хьунни лавайсса даражалий, рязину ливчIунни тамашачиталгу, гьуртту хьумигу.
ХIадур бувссар И. Саидовал