Щинал вих буххай­сса хьхьирил аьралитурал кьинилуцIун дархIуну, МахIачкъалалив Лениннул комсомолданул цIанийсса паркраву хьунни Совет Союзрал Виричу МахIаммад ХIажиевлун хас дур­сса митинг. Митинграл сакиншинначиталну хьунни МахIачкъала шагьрулул администрациялул спортрал, туризмалул ва жагьилтурал иширттал комитет.
Мероприятие дайдирхьунни МахIаммад ХIажиевлул гьай­калданучIа тIутIив дишаврийну.
Шичча митинграл гьурттушинначитал бавтIунни паркраву Ватан душманная дуручлай бивкIминнансса гьайкалданучIан. Гьайкалда­нучIа тIутIащал ва транспарантирттащал кьюкьри дурну бавцIуну бия чIюлуну лархсса цалчинмур кадетътурал корпусрал ва шагьрулул школардал дуклаки оьрчIру. Митинграй гьурттушинна дан бувкIун бия МахIачкъала шагьрулул администрациялул, республикалул жяматийсса организациярдал, М. ХIажиевлул цIанийсса заводрал вакилтал, «Единая Россия» партиялул региондалул отделениялул члентал, студентътал, спорт­школардайн заназисса оьрчIру-душру, Виричунал гъан-маччами, дустал. Аьмну 500-нния ливчусса инсантурал гьурттушинна дунни митинграй. Шикку ихтилатру буллалими буслай бия немецнал чапхунчитурая Ватан дуручлай жан дуллусса кIилчинмур ранграл капитан, Ухссавнил флотрал вих буххай жамирдал дивизиондалул командир МахIаммад ХIажиевлул виричушиврия.
МахIачкъала шагьрулул бакI­чинал хъиривчу Запир Алхасовлул цала ихтилатраву кIицI лавгунни МахIаммад ХIажиев, Дагъусттаннал бакъассагу, щалагу билаятрал пахрулунсса арс ушиву.
— Дагъусттанлувтурал дазу-зума дакъасса виричушиву ккаккан дур­ссар Хъунмасса Буттал кIанттул цIанийсса дяъвилий. На барчаллагь учин ччай ура цинявппагу жула ветерантурахь. ДакI ххарину дур ва митинграйн вайксса жагьи-жугьулт бувкIун тIий. Жула тарих хъамамабитару, жула вирттаврал аьпа буруччияра тIий ура жагьилминнахьгу, — увкунни Запир Алхасовлул.
Хъирив ихтилат бунни отставкалийсса генерал-майор, республикалул ТОКС-рал каялувчи Оьмар Муртузалиевлул.
— Бусалдаравун агьсса жула Виричу МахIаммад ХIажиевлул цIа абад дурну дуссар Мурманскаллал областьрай. Тикку бувссар Виричунал цIа дирзсса шагьру. Жула Виричунал цIа та шагьрулун дизан хъунмасса хIарачат бувссар Ух­ссавнил флотрал командованиялул. ХIакьинусса кьинигу ХIажиево шагьрулул агьулданул хIурматрай кьамул байссар жула инсантал, — увкунни Оьмар Муртузалиевлул.
Дагъусттаннал Ветерантурал советрал председатель МахIарам Алиджановлул кIицI лавгунни жула билаятрал аьрал ва флот мудангу цIакьсса бивкIшиву.
— Виричушиву дансса иш оьрмулуву тачIавгу чан къашайссар.
ХIакьину Дагъусттаннай 34 Аьра­сатнал Виричу уссар, цала къучагъшиврийну му бюхттулсса цIа лайкь дурсса, — увкунни ванал.
Ихтилатру бунни мукунма МахIачкъала шагьрулул Ветерантурал советрал председатель ХIусайн ХIусайновлул, МахIачкъала шагьрулул мажлисрал хъунаманал хъиривчу Паша Аллахвердиевлул, пенсионер Айгин Балабековлул. Аьра­сатнал Виричу Г. Н. Трошевлул цIанийсса Дагъусттаннал 1-мур кадетътурал корпусрал директорнал хъиривчу Арсен БахIандовлул бувсунни кадетътурал гьарица шинах гьурттушинна дайшиву ва митинграй.
Студентътурал чулуха ихтилат бунни Щалагу Аьрасатнал юстициялул паччахIлугърал университетрал студентка Милена Мурад­аьлиевал.
Каспийскаллал кадетътурал хьхьирил школа-интернатраву дук­лакисса Тимур Кьурбановлул бувсунни цанма МахIаммад ХIажиев кунасса подводник хьунсса хиял бушиву.
Ахирданий Спортрал, туризмалул ва жагьилтурал иширттал комитетрал председатель Марат Ибрагьимовлул барчаллагь увкунни шадлугърал мероприятиялий гьуртту хьун бувкIсса цинявннахь. Дагъусттанчу МахIаммад ХIажиев хъанахъиссар щалагу жула билаят­рал яла цIа дуркми подводниктуравасса ца. Мунал цIаницIун дархIуну дур Хъунмасса Буттал кIанттул цIанийсса дяъвилий Заполярьялий хьусса къизгъинсса талатавуртту. Дяъви байбивхьу­сса чIумал МахIаммад ХIажиев Ух­ссавнил флотрай къуллугъ буллай ивкIун ур. Му чIумал му щинал вих буххайсса жамирдал бригадалул 1-мур дивизиондалул командирну ивкIун ур. 1941 шинал мунан кIилчинмур ранграл капитаннал цIа дуллуну диркIун дур. Дяъви байбивхьуну махъ ва гьуртту хьуну ур 12 аьрали походраву. Ца шинал дянив ванал бюкьан бувну бур душманнал 10 жами. МахIаммад ХIажиевлул дайдихьу дурну дур душманнал жамирду артиллериялул кумаграцIух бюкьан буллалаврил. Мунал аьдатравун дуртун дур экипажрал хьхьирий ххувшаву ларстари, савлугъран салютру ритавугу. 1942 шинал май зурул 12-нний МахIаммад ХIажиев усса щинал вих буххайсса жами «К-23» душманнал самолетирттая битлай бюкьан бувну бур.
Мура шинал октябрь зурул 23-нний МахIаммад ХIажиевлун Совет Союзрал Виричу тIисса цIа дуллуну дур.
ХIадур бувссар
Андриана Аьбдуллаевал