Мартрал 10-нний МахIачкъалалив хьунни «Аьрасатнал Халкьуннал Ассамблея» тIисса Щалвагу Аьрасатнал жяматийсса организациялул Дагъусттаннал отделениялул конференция.

Конференциялий бусрав­сса хъамаличу хIисаврай гьуртту хьунни Аьрасатнал Халкьуннал Ассамблеялул Советрал председательнал хъиривчу Ирина Галанова.
Конференциялий хъунмур махъ лавхъунни Ассамблеялул Дагъусттаннал отделениялул (ДРО-рал) председатель Зикруллагь Илиясовлул. Ганал бусаврийн бувну, Ассамблеялул Да­гъусттаннал отделение юридийну сакин хьуссар 2015 шинал, амма му цIанагу щаллуну сакин къархьуссар. ЦIанасса ппурттуву организациялуву хIисавну бур 7 азаллийсса инсантал.
Зикруллагь Илиясовлул бувсунни ДРО-рал дурсса давурттал хIасиллая. «2016 шинал республикалий Аьрасатнал Халкьуннал Ассамблеялул» сипталийну дурну дур 10-нния лирчусса давуртту. Ми давуртту дурссар Аьрасатнал Миллатирттал политикалул стратегиялуцIун бавкьуну.
Дагъусттаннал Миллатир­ттал политикалул министерствалул кабакьу бувну ва «Дагъусттанлувтал Аьрасатнал кьадардануву» Дагестанцы в судьбе Ро­ссии» тIисса ДР-лул Миллатир­ттал министерствалул проект дузрайн дуккан даврил лагрулуву итабавкьуну бур республикалул цIа дурксса вакилтураясса лу­ттирду: «Дагъусттаннал Вирттал: Ватандалул цIанийсса оьрму ва бивкIу, «Дагъусттанлувтал Аьрасатнал кьадардануву», — увкунни З. Илиясовлул.
Дагъусттаннал мазру буру­ччаврия ихтилат буллай, З. Илиясовлул бувсунни, Ассамблеялул кумаграйну итабавкьуну бушиву Александр Пушкиннул «Евгений Онегин» тIисса роман яру­ссаннал мазрай.
Ганал мукунма бувсунни Аьра­сатнал Халкьуннал Ассамблеялул» ДРО-рал бувну бивкIшиву сайки ацIваксса «ккуркки столлу» миллатирттал ва диннал масъаларттан хас бувну, террорчишиврийн къаршисса ва цаймигу ма­съаларттан хас бувну.
Ганая махъ ихтилат буллай, Ассамблеялул ДРО-рал член Сусанна Мирзахановал организациялул вакилтурахь тавакъю бунни социал сетирдаву чялишну гьаз буллан ниттил мазру буруччаврил хIакъиравусса масъалартту, мазру машгьур буллан жагьилтурал ккураннаву.
Конференциялий махъ лавхъунни «Аьрасатнал Халкьуннал Ассамблеялул» Советрал председательнал хъиривчу Ирина Галановал, ДРО-рал члентал Умар-Усман ХIажиевлул, Хан Башировлул, Салауттин Зайналовлул, Людмила Авшалумовал, Аьли Камаловлул.
Конференциялул хIасиллайн бувну, «Аьрасатнал Халкьуннал Ассамблея» тIисса жяматийсса организациялул отчетру дулаврил ва бувчIавурттал VII съездрайн­сса делегатътал бувчIунни.