Дагъусттаннал БакIчи Рамазан АьбдуллатIипов гьуртту ­хьу­нни февральданул 27-нний Сочилий тIивтIусса Аьрасатнал инвестициярдал «Сочи-2017» форумрай.

Форум тIивтIуну, махъгу лавхъунни АьФ-лул ХIукуматрал Председатель Дмитрий Медведевлул.
«Форум муданма ххуйсса кIану хъанахъиссар цалва-цалва пикри-зикрирду бусансса, ялун буккансса цIу-цIусса давур­ттал уртакьтал лякъинсса, цалва регионнал ва компанияр­ттал экономикалул бюхъурдащал кIул бансса. Ва жулва агьаммур кIинтнил форумри, ва тIивтIуну бур жулва циняв хъамаллуран ва хъунмурчIин ххал бигьлай бур регионнал масъалар­тту. Махъсса цаппара шиннардий жува хIарачат буллай буру дунияллул экономикалуву хьу­сса кризисрал ишру ва санкциярду сававну жулла экономикалувусса захIматшивуртту духлаган дуван.
ХIакьину жущава кьянкьану учин бюхълай бур ми захI­матшивурттащал лаян бюхълай бур куну. Виваллил валовый продукт (ВВП) яларай дагьлагьаву дацIан дарду. Январьданул статистикалул ккаккан бунни агьалинал доходру гьарза хьуну душиву 8 процентрал, хьхьичIмур шинах бурувгун. Гьай-гьай, му ишираву хъунмасса кIану бугьлагьиссар цал архIал пенсия булаву (5 азарда къуруш), амма ми хIисавравун къаларснугу, жулва инсантурал доходру хIаллих тIий лахъ хъанай дур. Ми гьарзат утти цIакь буллан аьркинни», — увкунни Дмитрий Медведевлул.
Яла ххал бигьлай байбивхьунни форумрал кьинилул масъалартту.