Март зурул 20-нний ЦIуссалакрал райондалий ЦIуссалакрал гимназиялий хьунни райондалул школардал дянивсса шахматирттай буккаврил бяст-ччал.

Шикку гьуртту хьунни ЦIу­ссалакрал гимназиялул, Чапаевкаллал 2-мур школалул, Гьамиящиял 2-мур школалул, ТIюхчардал, Аьхъардал ва Шушиннал школардал командар­тту. Вай барча буллалисса ихтилат бунни ЦIуссалакрал гимназиялул директор Светлана Султановал.
Бяст-ччаллий буклакими оьрмулул шиннах бурувгун кIива бутIуйх бавчIуну бия. КIивагу группалувусса бяст-ччаллал хIасиллайн бувну, цалчинсса кIанттурду бувгьу­нни ТIюхчардал ва Чапаевкаллал 2-мур школалул командарттал; 2-мур кIану – Гьамиящиял 2-мур школалул командалул; 3-мур – Аьхъардал школалул командалул.
Ххув хьусса командарттан ва хьхьичIун бувксса оьрчIан бу­л­лунни дипломру.
Турнирданий ххув хьуминная сакин дан тIий бур республикалул шахматирттал фестивальданий гьуртту хьунсса цачIун дур команда. Шиккува кIицI лаган, ЦIуссалакрал райондалий хъуннасса къулагъас дуллай бур ва журалул спорт машгьур бан. Школардай дихьлай бур шахмат­рай буккаврил дарсру, зий дур мукуннасса кружокру.
Лажин хIадур дурссар
А. Аьбдуллаевал