Мартрал 19-нний Къирим Республикалийн къуллугърал аьрххилий лавгун ивкIсса Дагъусттаннал БакIчи Рамазан АьбдуллатIипов гьуртту хьунни «Оьруснал инт-2017» («Русская весна-2017») тIисса парусрайсса регаталий.
Къирим Аьрасатнащал цачIун хьуну шанна шин шаврил савлугъиннан сакин бувсса бяст-ччаллу хьуну бур Севастополлал аквоториялул бугъазравусса «Ушакова балка» тIисса яхт-клубраву. Бяст-ччаллу бивкIссар АьФ-лул Президентнал СКФО-райсса вакил, вице-адмирал, АьФ-лул Виричу Олег Беловенцевлул завардал цIанийсса.
Тикку махъ лахълай, Олег Беловенцевлул увкунни: «На ххариссара шиная шинайн ва регаталий гьуртту шайми гьарза хъанахъаврия. Ва даву утти аьдатравун дагьну дур, на вихну ура жура ва ттинияр шихуннайгу дулланшиврий. Регаталий гьуртту хъанай бур жулва цIа дурксса спортсментал – парусниктал ва цаймигу регионнаясса хъамал. Мунил дуллалиссар жулла цашиврул, чIявумиллатру бушиврул ва жулва билаятрал кьуват лахъ хъанахъаврил барашин».
Журналистътуращалсса ихтилатраву Къирим Республикалул БакIчи Сергей Аксеновлул бувсунни бяст-ччаллавух гьуртту хъанай бушиву Аьрасатнал субъектирдал губернатортал, Ухссавнил Ккавкказуллал округ, ЛухIи хьхьирил флотрал командующий, Аьрасатнал ВДВ-лул командующий.
Ганал бусаврийн бувну, укунсса конкуренция къадиркIссар тачIав. Севастополь ва Къиримнал шагьрурду хъанай бур яхтардал спортрал дязаннуну.
Регаталий мукунма гьуртту хьунни Гьавалул десант аьралуннал ялувсса генерал-полковник Андрей Сердюков, ЛухIи хьхьирил ялувсса командующий адмирал Александр Витко, Севастополлал губернаторнал кIанайма Дмитрий Овсянников, Ухссавнил АьсатIин-Алания Республикалул БакIчи Вячеслав Битаров, Ставрополлал улклул Губернатор Владимир Владимиров, Къабардин-Балкьар Республикалул БакIчи Юрий Коков, Къарачай-Чаргас Республикалул БакIчи Рашид Темрезов ва цаймигу.
