Март зурул 16-нний Дагъусттаннал техникалул университет­раву хьунни «Дусшиврул чагъарду», «Жува цачIу буссару» тIисса цIанилусса студентътурал фестиваль. Фестиваль хIадур дурну дия Дагъусттаннал ВУЗ-ирдал студентътурал ва Виваллил иширттал министерствалул оператив группировкалул гьурттушиндарайну.

А. Аьбдуллаева
Фестиваль вара цIанилусса пат­риот акциялул дайдихьуну хьунни. Ванил лагрулий Дагъусттаннал технический университетрал студентътурал гьан дунни билаятрал цайми шагьрурдай дуклакисса цала чIунархIал оьрчIайн видеолабизавурттугу.
Фестивальданий гьуртту хьунни ДР-лул миллатрал политикалул министр Татьяна Гамалей, ДР-лул жагьилтурал иширттал министр Арсен ХIажиев, УОООП-рал хъунама, полициялул полковник Микаил Ма­ккашарипов, участковыйтурал даврил сакиншиндарал отделданул хъунама, полициялул подполковник Султан Карибов, Да­гъусттаннал вуз-ирдал ва ссуз-ирдал студентътал.
Цила ихтилатраву Татьяна Гамалейл кIицI лавгунни жагьи-жугьултрал дянив терроризмалул ва экстремизмалул пикрирду ппив хьун къабитаву, студентътал цачIун баву, миннал дянивсса дусшиву цIакь даву мурадрай дуллалисса мероприятиялул агьамшиву. Дагъус­ттаннал технический университетрал проректор Елена Павлюченкол бувсунни фестивальданул мурад Аьрасатнал халкьуннал культуралущал, аьдатирттащал кIул баву, Аьрасатнал субъектирдал дянивсса дусшиврул арарду цIакь даву бушиву.
Ихтилатру къуртал хьуну махъ студентътурал ккаккан дунни цала хIадур дурсса концертрал программа, Аьрасатнал ва республикалул конкурсирттаву ва фестиваллай ххув хьусса «Къапкъазуллал барзунтту» тIисса ДГТУ-рал хореографиялул ансамбльданул ккаккан дунни авурсса къавтIавуртту. Студентътурал увкунни дяъвилул балайрду, бувккунни шеърирду. Ватан дуручлай жанну дуллусса полициялул зузалтран хас дурсса цила чирчусса назму дурккунни МВД-лул хъунмур инспектор, полициялул майор Ума Аскерхановал. Аьра­сатнал МВД-лул ЧIумуйсса оператив группировкалул вокальный коллективрал щаллу дунни Кубаннал жагьилтурал гимн.
Ахирданий студентътурал дурккунни цала чIунархIал оьрчIайнсса оьвчаву:
— Аьрасатнал бучIантIимур жула кIунттихьри бусса. Душманнаягу бурувччуну, билаят жуйнма тапшур бувссар жула бу­ттахъал. ХIакьину жува дуклай, кIулшивуртту ласлай буру, гьун­ттий билаятрайгу, республикалийгу жуйнма тапшур бантIиссар жаваблувсса къуллугъру. Жуятува чIявусса ишру хъар хъанахъиссар. Жулва бияла хъунмассар. Ва фестивальданийгу жун Да­гъусттанналгу, Аьрасатнал цайми вуз-ирдал студентътуралгу дянивсса дусшиврул арарду цIакь дан ччай бур.
Акциялул сценарийлийн бувну, Дагъусттаннал студентътуран жавабрансса шадлугърал мероприятияртту хIадур дуллай бур Тихоокеан университетрал (Хабаровск) ва Хабаровскаллал экономикалул техникумрал студентътал.