ДР-лул Культуралул министерствалул ва шинал щурущи дунни цIусса проект – «СахIналул усттартал – Дагъусттаннал инсантуран» цIанилусса. Мунил лагрулий республикалул театрду цала язими спектакльлащал ва концертрал программарттащал биллантIиссар Дагъусттаннал гай яла архми шяраваллавунгу.

Бадрижамал Аьлиева
«СахIналул усттартал» проект сакин хьуну дур кIива подпроект­рая: «Театрал искусство – Дагъус­ттаннал инсантуран» ва «Музыкалул искусство – Дагъусттаннал инсантуран». Ва даву дуван пикри бувну бур республикалул хъуншагьрулучIату архну ялапар хъанахъисса дагъус­ттанлувтураща театрдавун, концертирттайн занан къабюхъла­хъишивугу хIисавравун лавсун.
Ва шинал, сакин бувсса графикрайн бувну, республикалул театрду ва концертрал организацияртту байбивхьунни республикалул шагьрурдайн ва районнайн гастроллай занай. Уттинин му проектрал лагрулий Лакрал театр бивунни Къизлар шагьрулийн, Лазгиял театр – Хивуллал райондалийн, Даргиял театр – Дахадаевуллал райондалийн, филармониялул Камерданул оркестр – ДагъОгни шагьрулийн. Вания тинмай проект­рал гьурттучитал ччясса чIумуву биянтIиссар Каспийск, Избербаш шагьрурдайн, Сергокъалаллал, Бабаюртуллал, Тарумовкаллал, Нугъайнал ва Дарбантуллал районнайн.
Къизлардал райондалийнмур аьрххилия Лакрал театрданул артистътал рязину ливчIунни, ххуйну кьамул бунну, ххуйну тIайлагу бувккунну тIий.