Расуллул арс МахIаммадов Рашид
Уттигъанну, захIматсса азаруннища ххассал къавхьуну, аьпалул хьунни ххаллилсса лаккучу, Шахьуйннал шяравасса Расуллул арс МахIаммадов Рашид.

Рашид увссар 1944 шинал Шахьуйннал шяраву, Расуллул ва ПатIимал кулпатраву. Рашидлул оьрчIнийсса шинну ларгссар буттал шяраву. Буттал кIанттул цIанийсса дяъвилия муша­къатну, ца ччаннацIа хьуну, зана хьуссар Рашидлул ппу Расул. Буттал шяраву колхозраву цал бригадирну, яла колхозрал председательну зий цикссагу шинну дурссар Расуллул. Махъ вайннал кулпат бивзссар Харьковуллал областьрайсса Чугуев шагьрулийн. Тикку Рашидлул школагу къуртал бувссар мусил медальданий. Муния махъ, ххаллил­сса даражалий экзаменнугу дуллуну, увхссар билаятрал ца яла хьхьичIунмур техникалул вузравун – Харьковуллал радиоэлектроникалул институтравун. Мугу хьхьичIунну къуртал бувну, Рашид цала язи бувгьусса пишарай Харьков шагьрулий зий икIайссия, радиоэлектрон промышленностьрал аралуву ца яла хьхьичIунма, тIалавма пишакарну. Ва цимилгу лайкь хьуссия ларайсса бахшиширттан, наградарттан.
Пенсиялийн увккун махъ Рашид ивзссия Санкт-Петербург шагьрулийн, цала ца акъа-акъасса арснал МахIаммадлул (Мишал) кулпат ялапар хъанахъисса кIанайн. ЧIалачIин къадикIайва Рашидлун арснал кулпатраха, дазу-зума дакъа ххирая арснал оьрчIру ва цала дусса чIун миннащал гьан дайва.
Рашид ия ляличIисса инсан, цумусса, пахру-ххара ба­къасса, инсаннан хъинбала буван ччисса, марцIсса ва тIиртIусса дакIнил заллу. Ва ия гьарцагу чулуха итххявхсса инсан.
Рашидлул бивкIулул кьур­чIи­шивугу кIидачIлай, жижара буллай буру арснахь Ма­хIаммадлухь, мунал кулпатрахь, оьрчIахь, уссурваврахь Залимханнухь ва Аьвдулжалиллухь, буттауссихь Ссаланнухь, цинявппагу ссурахъаврахь ва махъсса гъан-маччанахь. Рашид кIулну ивкIминнал дакIурдиву мудангу утта­вассар ванал аьпа.
Рашидлул рухI хъинний дишиннав, бунагьирттал аьпа баннав, алжан нясив буваннав. Ванан къабуллумур оьрмулул бутIа арснан, арснал оьрчIан булуннав.
Шахьуйннал жямат

Шагьабуттиннул душ ХIусайнова Ара
Уттигъанну, оьрмулул 85 шинаву, дунияллия лавгунни Дагъусттаннал культура гьаз дуван хъунмасса захIмат бивхьусса ххаллилсса хъамитайпа, Дагъусттаннал культуралул лайкь хьусса зузала, Аьра­сатнал культуралул лайкь хьусса зузала, Шагьабуттиннул душ ХIусайнова Ара.

Ва бувну бур 1-мур ЦIувкIрав, 1944 шинал бувкIун бур ЦIусса­лаккуйн нитти-буттащал.
Арал сайки щала оьрму лавг­ссар, ЦIуссалакрал райондалий культуралул даву хьхьичIуннай дуллай. Ва ЦIуссаккуллал шяраваллил библиотекалий каялувшиву дуллай бивкIссар, муницIухва райондалул Хъаннил советрал хъунмурнугу бивкIссар. Дяшяравусса вайннал ужагърай тачIав хъамал, бухху-букку чан къавхьу­ссар. Арал ва ванил ласнал, Дагъус­ттаннал лайкь хьусса механизатор, ХIажинал, къатта республикалул хIурматрайсса хъамал бацIайсса къатта бивкIссар. Гьамин вайннал ужагърайри 1970 шинал Совет Союзрал кIийла Виричу АхIмад-Хан Султаннущалсса (ва Арал ниттил ссурахъур) делегация хIурматрай кьамул бувну бивкIссагу. Арал тIювар 1999 шиналсса дяъвилул ппурттувугу ополчентурансса штабну хьусса.
ЧIумух бурувгун, чантI увку­сса, дурккусса, аькьлу бусса Ара Шагьабуттиновнал чIявусса ташурду лиян къабивтссар. Женорг хIисаврай, ваничIан уххайсса ивкIссар гьарма дакIниймур бусангу, дард кIидачIингу. Ва халкьуннан маслихIатчия, гьарманал щавуй ка дишин анавар буккайссия.
Ца макьала лях гьан къариртун, буккайссия Арал «Илчи» кказитгу, ххуй дирзсса макьалартту, дартIун, салкьи дуллан бикIайва, ичIува хъамаллурахь ккалан бикIайва.
ДакIнийхтунусса кьурчIишиву кIидачIлай, жижара буллай буру ХIусайнова Арал душваврахь, уссур-ссуннахь, гъан-маччацириннахь. Цув Алжаннул ххари буваннав, гьаттай нур дизаннав!
ЦIуссалакрал райондалул жямат, 1-мур ЦIувкIуллал жямат