Уттигъанну, февраль зурул 10-13-нний, Башкириянал хъун шагьру Уфалий хьунни Башкириянал паччахIлугърал медициналул университетрал гьану бивзун 85 шин шаврин хас дурсса, АьФ-лул медициналул ва фармацевтический ВУЗ-ирдал дянивсса щалагу Аьрасатнал кикбоксинграл турнир. Ва турнирданий 3-сса кIану бувгьунни Дагъусттаннал медакадемиялул стоматологиялул факультетрал студент, Сапижуллагьлул арс Пятали Аьбдуллаевлул.

И. Саидова
Пяталил ва спортрахун агьну шиннагу хьун дурассар. Амма Аьрасатнал личIи-личIисса регионнаясса диялсса командар­тту гьуртту хьусса ва турнирданий ванаща хьхьичIунсса кIану бугьан бювхъунни. Спортрахсса ччаву ва бюхъу Пяталин бутта­хъая бивсса бухьунссар, ванал бу­ттал тухумрал чиваркI цинявппа спортраву итххявхсса бур. Пяталил буттал Сапижуллагьлул къуртал бувссар Дагъусттаннал педуниверситетрал физкультуралул факультет. Школалий дуклакисса шиннардий ва гьуртту шайссия циняв райондалул ва республикалул соревнованиярттай, бугьайссия хьхьичIунсса кIанттурду сайки циняв журалул спортрал бяст-ччаллаву. Сапижуллагьлул ппу Аьбдуллаев Пятали МахIаммадович Ккур­ккуллал школалий физкультуралул дарсру дихьлай уссия. Ванал хIадур дурсса Ккурккуллал школалул командалулгу райондалул ва республикалул соревнованиярттай хьхьичIунсса кIанттурду бугьайссия. Утти ванал цIа дирз­сса арснал оьрчIалгу спортраву хьхьичIуннайшивуртту чIалачIи дунни.
Ларгсса шинал цалчинсса «Грэпплинграл» тIиртIу турнирданийгу Пяталил 3-сса кIану бувгьуссия.
Уттигу Уфа шагьрулия ва Кубокращал ва дипломращал зана хьунни.
Ххув шаврищал барча ­уллай, чIа тIий буру Пяталин цIуллу­шиву, тIайлабацIурду. Ванияр бюхттулми шачIанттайнгу лавхъун ккакканнав.