Январь зурул 1-нния байбивхьуну, МахIачкъалалив цалчинсса аьрали сияхIрай бихьлахьиссар 2000-ку шинал бувсса, мукунма ци-бунугу багьана-сававрттайн бувну уттинин му сияхIрай къабивхьусса, 27 шин хьуннинсса жагьилтал. Жагьилтал цIуллу-сагъшиврул ва пишакаршиврул чулуха ххал буллалисса кампания зун тIий дур март зурул 31-ннийн бияннин.

МахIачкъалалив комиссиялийн учIан тIий ур 1971 инсан. Комиссиялул хIасиллайн бувну, минна­хьхьун аьралуннаву къуллугъ буллан бучIи буллалисса удостоверенияртту булун тIий бур. МахIачкъалаллал аьрали комиссариатрал жагьилтал хIадур баврил ва аьралуннаву къуллугъ бан буцаврил отделениялул хъунама, подполковник Альберт РахIимовлул бусласимунийн бувну, цалчин аьра­ли сияхIрай чара бакъа бацIан аьркинссар къуллугъ бан буцай­сса оьрмулувун бияннинсса оьрчIру приписной свидетельство (аьралуннаву къуллугъ бан аьркинсса жагьилнал удостоверение) ласаву мурадрай. Микку ккаккан бувну буссар цIуллу-сагъшиврул тагьарданийн бувну жагьил къуллугъ буллантIиссарив аьралуннаву ягу къабуллантIиссарив, мукунма бюхъантIиссарив мунаща аьрали пиша лахьхьин.
«О воинской обязанности в военной службе» тIисса АьФ-лул закондалийн бувну, цалчин аьрали сияхIрай ишайссар январь зурул 1-нния байбивхьуну март зурул 31-ннийн бияннинсса чIумуву. Дагъусттаннал БакIчинал хIукмулийну, МахIачкъалалив сакин бувну бур му масъалалуха зузисса коми­ссия. Мунил председатель хъанай ур аьрали комиссар. Комиссиялуву бур личIи-личIисса хIакинтал, шагьрулул администрациялул вакилтал. ЧIявучин военкоматрайн жагьилтал бучIай архIал, цивппа дуклакисса идаралул хъунаманащал. Военкоматрал зузалал запрос гьан дайссар, дуклаки оьрчIру кка­ккан дурсса кьини бучIайссар. Агана жагьил чувчIав дуклай акъа­хьурча, мунайн цалчин аьрали сияхIрай ацIан оьвтIисса повестка дучIайссар шардайн.
— Цалчин аьрали сияхIрай ацIаврия нигьа буслан аьркиншиву дакъассар. Му сияхIрай ацIлацIисса чIумал жагьилтурал цIуллу-сагъшиврул тагьар ххал дайссар хIакинтурал: терапевтнал, офтальмологнал, хирургнал, отолорингологнал, стоматологнал, невропатологнал ва психиатрнал.
Гьарица хIакиннал ккаккан байссар, цIуллу-сагъшиврул тагьарданух бурувгун, бучIину бу­ссарив ягу бакъассарив жагьилнан аьралуннаву къуллугъ бан. Миннал чивчумур бусайссар жагьилтал цалчин аьрали сияхIрай бишайсса коми­ссиялул председательнал, му чичру лахъан дайссар приписной свидетельствалийнгу.
Цалчин аьрали сияхIрай бихьлахьисса чIумал жу маслихIат буллан бикIару жагьилтурахь аьралуннал ВУЗ-давун буххан. Циняв ккаккиярттах бурувгун лайкьсса ухьурча, цанмагу ччай бухьурча, мунал личное дело тIайла дуккайссар АьФ-лул Минобороналул дуккаврил заведениялувун, тIий ур Альберт РахIимов.
Ванал бувсунни цалчин аьрали сияхIрай бацIан комиссия бан аьркинсса 1971 инсаннава 1149 инсаннал му уттинин бувшиву.
— ЦIуллу-цIакьсса, аьралуннаву къуллугъ буллан бучIисса чансса бур. ЧIявуми кару-ччанну цIуцIисса бур. Бур мукунма плоскостопие, сколиоз, яруннил азарду дусса. Бунугу, жагьилтал анаварну, рязину най бур сияхIрай бацIан, — буслай ур Альберт РахIимов.
Аьралуннаву къуллугъ бан пайда бакъашиврий ккаккан бувсса жагьилтуран 18 шин шайхту военкомат­райн бувкIун, призыврал комиссия бан аьркинну бур. Мунияр махъ хIукму буллай бур ми жагьилтал цIуллу-сагъшиврул тагьарданийн бувну запасрай битан ва буллай бур миннахьхьун аьрали билет.
МахIачкъалаллал администрациялул пресс-служба
ХIадур бувссар
А. Аьбдуллаевал