Февраль зурул 28-нний Дагъусттаннал региондалийсса «Единая Россия» партиялул председатель Дмитрий Медведевлул кьамул бай къатлуву агьали кьамул бунни Аьрасатнал ПаччахIлугърал Думалул депутат Аьвдулмажид МахIрамовлул.
И. Саидова
МахIачкъалалив ялапар хъанахъисса пенсионер МахIаммадов ХIусайн увкIунни республикалийсса ца азарханалий уттуишин уван кумаг бувара тIий. Мунал хIакъираву депутатнал, республикалул 1-мур азарханалул хъунама хIакиннайн оьвкуну, тIалав бунни къашайшалал мурад щаллу баву.
Хасавюртлив ялапар хъанахъисса, оьрмулул 16 шинавусса ХIайдарова Анита бувкIун бия цивппа ялапар хъанахъисса къатравусса шартIру къулай дан кумаг бара тIий. Ванил бувсунни цуппа художница бушиву ва суратру дихьлай байбивхьушиву оьрмулул 3 шинаву. Депутатнал 15000 къурушран машан ларсунни ванил дирхьусса суратирттавасса ца суратгу. Мукунма, вайннал кулпат ахIвал-хIалданул чулуха ссуссукьусса бушиврийн бувну, МахIрамовлул тапшур бунни Хасавюртлив къатта-къуш булун ккаккан бувминнал сияхIрайн вайгу лахъан бан.
МахIачкъалалив ялапар хъанахъисса ДГУ-лул аспирант Халидов МахIаммад увкIун ия даврил щаллу ан кумаг бара тIий. Ванал масъалалул хIакъиравугу Аьвдулмажид МахIрамовлул га цIана оьвкунни ДГУНХ-лул ректор ЯхIия Бучаевлуйн.
ЦIуссалакрал райондалийсса ЦIуссамихилтIиял шяравасса МахIаммадова Айизай бувкIун бия МВД-лий зий ивкIсса цила арс махъунай даврийн кьамул уван кумаг бара тIий. Депутатнал ва масъала щаллу баву тапшур бунни ДР-лул МВД-лийн.
Ва кьини Аьвдулмажид МахIрамовлул кьамул унни 11 инсан. Гьарцагу увкIсса инсаннах вичIигу дирхьуну, депутатнал махъ буллунни агьалинал сукку бувсса масъалартту щаллу баврил ялув цува ацIан.
