Февральданул 22-нний МахIачкъалалив хьунни ОНФ-рал (Общероссийский народный фронт) Дагъусттаннайсса отделениялул «Генеральная уборка/интерактивная карта свалок» тIисса Аьрасатнал проект дузрайн

ХIасан Аьдилов
Журналистътуращал хьунабавкьунни ОНФ-рал региондалул штабрал член, «Генеральная уборка» проектрал координатор Зайдин Жамбулатов, ОНФ-рал региондалул штабрал член Жамалу­ттин Шигьабуттинов, «Зеленые» партиялул региондалул отделениялул советрал председатель Гъаирбаг АьбдурахIманов.
Зайдин Жанбулатовлул бувсмунийн бувну, «Генеральная уборка/Интерактивная карта свалок» (ЦIинцI-ччюрк дичайсса бакIурдал картарду) тIисса проект дузал дурну дур 2016 шинал ОНФ-рал форумрай Аьрасатнаву закондалий дакъасса цIинцI-ччюрк дичайсса бакIурдал масъала ххалбигьаврил хIасиллу дурну махъ. Форум хьуну махъ Аьрасатнал Президентнал бувсун бур жяматирттансса Интернет-картарду дузал дуван аьркиншиву, ми картардай ччиманаща бюхълай бур ккаккан дуван закондалий дакъасса, яни ихтияр дакъана бувсса цIинцI-ччюрк дичайсса бакIурду ва чичин га бакIуятусса цалва пикри-зикри.
ОНФ-рал проект дузрайн ду­ккан даврил материаллу хьунтIиссар «ЦIинцI-ччюрклил бакIурдал интерактивсса карталул» гьануну, га карта цурда хьун аьркинссар властьрал вакилнал «Столданийсса картану», яни ганал давурттал планну. Га карталий ккаккан бувсса цIинцIал бакIурду бухлаган баврил давур­ттал ялув бацIаву дуллан аьркин­ссар надзорданул ведомствартталгу. Инсантуран тIурча аьркинссар гай бакIурду букьан баврил хIакъираву баян буллан властрал органнайн.
Гьарца инсаннаща шайссар цалва информация бишин «ЦIинцI-ччюрклил интерактивсса карталий». Ми циняв информациярду ххал бигьайссар ОНР-данул экспертътурал.
Инсаннан аьркинссар кка­ккан буван цIинцI-ччюрк дичлачи­сса бакIу ягу полигон чув буссарив миннул сурат ягу видеоматериалгу дирхьуну.
ОНФ-рал вакилтурал ххал бай­ссар инсантурал ккаккан бувсса кIанттурду. Агарда карталий кка­ккан бувсса информация тIайласса бухьурча, миннуха зузиминнал дайдишайссар закондалийну ихтияр дакъа бувсса цIинцIал бакIу лакьаврил давуртту.
Масъалалул хIакъиравусса ихтилатру бунни мукунма Жамалу­ттин Шигьабуттиновлул ва Гъаирбаг АьбдурахIмановлул.
Яла миннал жавабру дуллунни журналистътурал суаллахьхьун.