Март зурул 11-нний Москавлив Арена 4 спорткомплексраву хьунни хъуннасса спортрал байран — волейболданул турнир «Лакку улклул кубок». Му сакин дурну дия Москавливсса лакрал жагьилтурал ккурандалул «Гъази-Гъумучи» фондрал кумаграйну.
Турнир тIитIлатIисса шадлугърай гьуртту хьунни «Дагъусттан» культуралул центрданул хъунама Арсен ХIусайнов ва отставкалийсса полковник Аббас Аьлишаев.
«Цумур-духьурчагу спортрал мероприялул инсантал цачIунмай буллалиссар, гъан буллалиссар, халкьуннал дянив дувшиву цIакь дуллалиссар. Волейболданул турниргу дуллалиссар ватандалия архну, мархрая ябувцуну ялапар хъанахъисса жула жагьилтал цачIунмай баву мурадрай. Жунма тачIав хъамабитан къааьркинссар жула гуж цашивруву бушиву. Умуд бур ва турнир бяс-ччал бакъа, куннайн ку хIусут къабувккун, дусшиврийсса хьунссар. ЛичIи-личIисса шяраваллал жагьилтал куннащал кув кIулгу хьуну, гихунмайгу куннащалсса куннал дахIаву яданссар тIисса,» — увкунни турнир тIитIлай, Москавливсса лакрал жагьилтурал ккурандалул хъунама Рашид ХIасайниевлул.
Гьуртту хъанахъиминнан тIайлабацIу чIатIий Арсен ХIусайновлул кIицI лавгуна ганиннин Москавливсса дагъусттанлувтал цачIун буллалисса ккуран диркIшиву так ца «Дагъусттан» культуралул центр. Ганил давриву хIала-гьурттумигу оьрмулул бугьарасса инсантал бивкIшиву. Мунийн бувну билаятрал хъуншагьрулий лакрал жагьилтурал ккуран сакин даврия цува хъинну рязину ушиву. Умуд бивхьунни, чIявуну шайсса куццуй, ккурандалул даву дяличIан къаританшиврий, гай цащалва уртакьну зунссар ва цаяра махъгу центрданул аьдатру ядансса ник ялун дукканссар тIисса.
Турнирданий ччалли дуккан Аьрасатнал личIи-личIисса кIанттурдава дуркIун дия 10 команда: Гъази-Гъумучиял щалла команда дуркIун дия Гъумуча «Гъази-Гъумучи» фондрал ва райондалул администрациялул харжлугърах; ЧIяйннал шяраваллил кIирагу команда дартIун дия Москавлив ялапар хъанахъисса шяравучутурая; Ваччиял команда дуркIун дия Подмосковьелия; Хъусращиял команда сакин хьуну дия Москавлия, Тверьдая ва МахIачкъалалия бувкIсса жагьилтурая; Ккуллал,Читтурдал, КIундиннал командарттаву буклай бия Москавлиясса МахIачкъалалия бувкIсса. Москавливсса лакрал жагьилтурал ккурандалул дия хасъсса команда.
ЛяличIинува бацIан ччива Вихьуллал комадалий. Бунияла хIадур хьуну бия вихьул бяс-ччаллийн. Аьрасатнал гьармурцIния бувкIун бия цала шяраваллил цIанилу волейболданий букканмигу, миннал чIарав бацIанмигу. Гьарцаннай бия «Вихьул» тIий лакку мазрай чивчусса футболкарду.
Цасса лаххия дия Гъази-Гъумучиял командалулгу.
Унгу-унгусса бяс-ччалливу финалданийн дурккуна ЧIяйннал 1-мур ва Вихьуллал командартту.
Ххув хьунни Вихьуллал команда. КIилчинмур кIану бувгьунни ЧIяйннал 1-мур командалул, 3-мур кIану — «Гъази-Гъумучиял» командалул.
Ххув хьусса командалун буллунни кубок ва къизлардал чIиллу. 2-3-ми кIантту бувгьусса командарттан буллунни Москавливсса лакрал жагьилтурал ккурандалул лишандалущалсса футболкарду ва «Дараччи» клубрал итабавкьусса «Лакрал магьри», «Мюрщи щаращал жюржу» ва «Ниттихасса балайрду» тIисса луттирду.
Турнирданий гьуртту хьун бувкIмигу, тамашалийн бувкIмигу барчаллагьрай бия турнирданул сакиншинначитурайн ца Аьрасатнавух ппив хьусса лакрал жагьилтал цачIун батIинсса байран сакин даврихлу. Гьуртту хъанахъимигу, тамашачиталгу хIисавну ва кьини Арена 4 спорткомплекравун бавтIун бухьунссия сайки ххюттуршуннийнсса бивсса лак.
Турнир тIитIлатIисса шадлугърай гьуртту хьунни профессор, Москавливсса «Дагъусттан» культуралул центрданул хъунама Арсен Хiусайнов ва отставкалийсса полковник Аббас Аьлишаев.
«Жула миллат гьар кIани-кIанттайх кIама бивщуну ялапар хъанай буру. Ва турнир сававну Аьрасатнал чIявусса шагьрурдаясса жагьилтал билаятрал хъуншагьрулий цачIун бавтIун, байрандалул лагрулийсса бяс-ччал хьунни. Цуксса къаххуйри?!
Шамилчинмур кIану бувгьусса Гъумучиял команда: ХIусманов Малик, Рамазанов Сагид, Гъапуров Гъапур, Рамазанов Салим, Хизриев Мубарак, Кьурбанов Марат ва Кьурбанов Рустам.
Хъунмасса барчаллагь ва турнир сакин дурминнайн. Укун цачIун къабатIларча буттал улклущалсса, ватанлувтуращалсса дахIаву руцантIиссар. Жу Липецкалий ялапар хъанахъисса вихьул хIарачат буллай буру жучIанма гъанну ялапар хъанахъисса шагьрурдайсса шяравучутуращалгу,лакращалгу дахIаву дугьан.
Цала шяраваллил командалул чIарав бацIан личIи-личIисса шагьрурдая бувкIун бия чIвусса вихьул.
Гьарца шинал майрал байраннай жу лахъа-хъунну кIицI лагайссар Вихьуллал кьини. Ттуршунниха ливчусса инсантал бучIай миккун. Лагайссару Воронежрай Дагъусттаннал диаспоралул дуллалисса байраннайнгу. Микку хьунабакьайссару лагмасса шагьрурдая бувкIсса лакращал,» — тIий буслай ур Липецкалия цала шяраваллил командалул чIарав ацIан увкIсса Кьурбан ХIусайнов.
Зулайхат Тахакьаева
