Уттигъанну ДР-лул культуралул министр Зарема Буттаева хьунабавкьунни республикалул магьирлугърал школардал ва музыкалул училищардал каялувчитуращал.
Ва кьини ххал бигьлагьисса агьаммур суалгу бия музыкалул кIулшиву дулаврил хIакьинусса тагьардануцIун бавхIусса, цил цалчинми шаттирдунугу хъанахъисса магьирлугърал школарттай ларсъсса кIулшивуртту, пишакаршиву. Махъсса ппурттуву му аралуву хьусса дахханашивурттал къаххуйсса асарду биян бувну бур аьмну музыкалул кIулшиву дулаврийн.
Шиная шинайн чан хъанай дур музыкалул училищардавун дуклан бухлахиминнал аьдад, училище бувккуну махъ оьрчIал гихуннайсса дуккаву дачин давугу нитти-буттан салахI къабизлай бур.
— ЦIанасса чIумал жула аьмсса хIарачатрайну ядуван аьркинни музыкалул кIулшиву дулаврил шанма шачIанттул система – «школа-училище-консерватория (творчествалул вуз)». ОьрчIал магьирлугърал школардал, эстетикалул аьмсса итххяххаврил программарду дакъасса, щаллу дуллай буссар «предпрофессионал» программардугу. Амма нитти-буттахъан ми ччан къадикIай, оьрчIан аьмну итххяххан ларай кIицI ларгсса цалчинми программардугу гьарча тIий. Школалул хьхьичI бивхьусса масъалагу – ххуйсса даражалул ва дакI дацIанну щаллу дурсса профориентациялул давур. Педагогтал тIурча, цала къуццулийну оьрчIан искусствалухасса къуллугърал эбратну хьун аьркинссар, мигу мукунмасса къуллугърайн гьуз учин буллай. Ва хъинну хъуннасса ва хъинну захIматсса давур, амма жува шаймур буван аьркинссар музыкалул кIулшиву ласаврил цасса «щинзир» къаруцаншиврул. ЦIу буккан буван аьркинни кураторствалул институт. Дуссия чIунну музыкалул училищардал преподавательтал, гьунар бусса оьрчIру ялун личин буллай, нитти-буттахь учинсса аьркинсса махъругу ляхълай, му аралуву щиривкIуну зузисса. Укунсса даврил хIасиллугу ххуйсса шайва, — увкунни Зарема Буттаевал.
Ихтилатру ялагу бунни МахIачкъала шагьрулул Культуралул управлениялул начальник Фарид Абалаевлул, Дагъусттаннал паччахIлугърал филармониялул художествалул каялувчи Ирина Нахтигальлул. БатIаврил давривух гьуртту хьунни Лакрал театрданул художествалул каялувчи Бадрижат МахIаммадхIажиева, Каспийскаллал шагьрулул Культуралул управлениялул хъунмур Аьйшат Айсаева ва цаймигу.
Хьунабакьаврил ахирданий хIукму бунни зузи группа сакин буван, цилгу ва кьини ххал бивгьусса пикрирдал, маслихIатирттал ялув бацIаву дувантIисса, миннувух – школардай кураторшиврул даву цIу дуккан даву, музыкалуву итххявхсса оьрчIал сияхIру дусса банк сакин баву ва м.ц..
