Февраль зурул 26-нний байбивхьуну, Каспийскалий Аьли Аьлиевлул цIанийсса спортрал комплексраву шанма гьантлий най дия «WorldSkills Russia» тIисса захIматрал пишарду машгьур буллалисса региондалул II-мур чемпионат. Мунил сакиншинначитал хьунни жагьилтал давурттал дузал буллалисса «Успех» тIисса центр ва Республикалул ЗахIматрал ва социал хьхьичIуннайшиврул министерство.

И. Саидова
Гьашину ва чемпионатрай 23 журалул захIматрал пишардал усттаршиву ккаккан дуллалисса бяст-ччалливу гьуртту хьунни республикалул 40 колледжравасса 110-нния ливчусса оьрчIру ва душру. Му бакъассагу, гьашинусса чемпионатрай ххи бунни «JuniorSkils» тIисса бутIа. Шикку дуклаки оьрчIал ккаккан бунни роботехникалул ва программар­тту даврил гьунарду.
Чемпионатрал бяст-ччаллан кьимат бищаврил стандартирттал курсирдайн занай, хIадур бувну буссия 140-нния ливчу­сса экспертътал. Агьамсса суккушиннардал агентствалул кумаграйн бувну, жула республикагу дурхссар «Кванториум» тIисса дуклаки оьрчIансса технопаркру бувансса, субсидияртту итабакьинтIисса 17 региондалул сияхIравун. Республикалий укунсса даражалул технопарк баву – му буниялагу хъуннасса агьамшиву ду­сса давур.
Мукунма ва чемпионатрал программалул лагрулий хьунни республикалий жагьилсса пишакартурал советрал суккушинна хIасул даврин, «Кванториум» технопарк сакин баврин хас бувсса «ккур­кки» столлу.
ЗахIматрал пишарду машгьур буллалисса чемпионатрал даву дайдихьлахьисса мажлисрай гьуртту хьунни ДР-лул ХIукуматрал председатель Аьвдуссамад ХIамидов, ванал цалчинма хъиривчу Анатолий Карибов, ДР-лул захIматрал ва социал хьхьичIуннайшиврул министр Расул Ибрагьимов, «WorldSkills Russia» жагьилтурал форум хьхьичIунмай баврил каялувчи Евгения Кожевникова, Дагъусттаннайсса «WorldSkills Russia» чемпионатрал даврил каялувчи Заур Оьмаров ва чIявусса цаймигу хъамал.
Шадлугърал даражалий чемпионатрал даву дайдихьлахьисса ихтилат бувна Аьвдуссамад ХIамидовлул.
— ЗахIматрал пишарду машгьур баву мурадрай дуллалисса чемпионат хъанахъиссар респуб­ликалий дуллалисса хъуннасса агьамшиву дусса давуну. Укун­сса чемпионатру даврийну жагьилтуран кувннацIа кувннан пишардал усттаршиву лахьхьин хъунмасса кумаг хъанахъиссар. Лавайсса даражалул захIматрал пишардал кадрарду биялну бакъахьурчан, республикалул экономикагу хьхьичIуннай дан захIматссар. Жула экономикалул бучIантIимур хъар хъана­хъиссар захIматрал пишардаяту. ХIакьинусса кьини ми личIинува тIалавну буссар, республикалий бакъассагу, щалагу билаятрай, — увкунни ХIамидовлул.
Шадлугърал даражалий­сса чемпионатрал мажлис бачин бувну ия АьФ-лул лайкь хьусса зузала, лачIунбуккаврил рингру дачин дайсса, жагьилтурал дянив сийлийсса шоумен Александр Загорский.
«Жагьилсса пишакартал» тIисса региондалул II-мур чемпионатрал даврил хIасиллу дуллалисса мажлис тIивтIуна Анатолий Карибовлул.
— ЗахIматрал пишарду машгьур баврил чемпионат даву жула республикалий аьдатравун дагьссар. Ларгсса шинах бурувгун, гьашинусса чемпионатрай кIилийну гьарза хьунни захIматрал пишардал аьдад. Вай бяст-ччаллай гьуртту хъанай, зул хьхьичI тIитIлатIиссар чIявусса ххуллурду. ЦIу-цIусса стандартирттайн бувну, ларайсса технологиярттал оборудованиярттащал зун бюхъаврийну, куртIсса кIулшивуртту ккаккан даву бакъассагу, зуща бюхъай­ссар республикалийсса ва билаят­райсса ччимур предприятиярттай зунгу. Умуд бур гихунмайгу вай чемпионатирттай гьуртту хъанахъисса жагьилтал хъиннува чIяву хьунссар тIисса, — увкуна Карибовлул.
Пишардал усттаршиву кка­ккан давриву хьхьичIун ливчусса жагьилтуран багьлул ларайсса бахшишру ва мусил медальлу тапшур дан бувкIун бия Респуб­ликалул жагьилтурал ишир­ттал министр Арсен ХIажиев, машлул ва промышленностьрал министр Юсуп Умавов, спортрал министрнал хъиривчу ХIайдарбаг ХIайдарбагов, элмулул ва кIулшиву дулаврил министрнал хъиривчу Альбина Арухова, культуралул министрнал хъиривчу Мурад ХIажиев, «Пери инновации» бизнес-инкубаторданул директор ХIажимурад Аьлиев ва цаймигу министерствардал ва ведомствардал вакилтал.
«Гильдия строителей СКФО» ассоциациялул директорнал хъиривчу ХIажи ХIажиевлул ХIурматрал орден дуллунни чемпионатрал даву лавайсса даражалий сакин дурсса, «Успех» центрданул директор Заур Оьма­ровлун.
Куклу машинартту бакьин баврил сянатраву ххув хьунни Сулайманов Нариман, сварка даврил сянатраву – Васильев Дмитрий, шяраваллил хозяйствалул машинартту зузи бавриву – МахIаммадов Шамил, графикалул дизайн давриву – ХIажиев Сяид, Web-дизайндалуву – Тюрюханова Кристина, дарзишивруву – Изиева Ххадижат, кондитершиврул давриву – Сотникова Елена, парикмахершиврул усттаршивруву – Кайрабекова ХIава, сетевой ва системный администрированиялуву – Мусаев Шамил, дукра даврил усттаршивруву – Бейболатова Саида, мобильная роботехникалуву – Шяъбанов АхIмад ва ПаттахIов Расул, къатри ва штукатурка давриву – Шарипов Жалалуттин, ЧПУ станокирттай дуллалисса токаршиврул давурттаву – Мажидов МахIаммадсаэд, ЧПУ станокирттай дуллалисса фрезерный давурттаву – Рамазанов Расим, мюрщими классирттаву дарсру дишавриву – ЯхIияева Рукьижат, рестораннал давриву – Сулайманов Нариман, медициналул ва социал буругавриву – Аьдилов Амибаг, CAD инженершиврул дизайндалуву – Жабраилов ТIагьир, кирпич бишавриву – Аьвдусаидов Тайгиб, штукатуркалул давур­ттаву – Жамалов Рамазан, гостиницардал давриву – Токаев Янибаг, электромонтажрал давриву – Мирзабагов Наир, заргалшиврул давриву – Аьлиханов ХIажимурад.
Призертуран цинявннан дуллунни «WorldSkills Russia» чемпионатрал сертификатру ва арцуйнусса бахшишру.
Ххув хьуминнан яла хъуннамур бахшиш хьунни Краснодардай хьунтIисса V-мур миллатирттал чемпионатрай гьурттушинна дувансса путевкарду.
Чемпионат къуртал хьунни тяхъасса концертрайну ва фейерверкирттайну.