Щалагу Аьрасатнаву хъинну чансса бакъа бакъахьунссар жула лакрал кунма авадансса кказитирттал тарих бусса миллат. ХIисав дара зура. 1912-кусса шиналва Санкт-Петербурглив, цала сакингу бувну,цала редакторшивугу дуллай,Саэд Габиевитабакьлай ивкIун ур лакку мазрайгу,оьрус мазрайгу кIива-кIива кказит: «Дагъус­ттаннал ххяххабаргъ» ва «Бусурманнал кказит». Муния махъ Щурагь 1917-кусса шинал, мукунма цалва сакингу бувну, редакторшивугу дурну, буккан буллай ивкIун ур «Илчи» тIисса лакку кказит жула миллатрал цамагу ххаллилсса арс Гьарун Саэдов.
Амма бакъахьунссар цамургу миллат, мукунсса тарихгу цилва бунува, ацIрахъул шиннардил мутталий бувагу кказит бакъа кьабивтун бивкIсса. Му кIантту сававну жула лакку мазрайнгу, цайми-цайми ххуй-хъиншивурттайнгу бивсса заралгу хъинну хъунмасса хьу­ссар. 1991-ку шиная шинмай, яни «Илчи» цIуницIакул буклай байбивхьусса чIумуя шинмай, жува хIарачат буллай бивкIссару миксса шиннардий лув личIан бувну бивкIмургу хъирив лахъан, му загълунсса заралгу чIиви личIан бан. Му хIарачатран цин лавхьхьусса барачатгу хьуну бу­сса ххай буру.
Гьашину ттуршра шин хъанахъиссар жува ялув кIицI був­сса Гьарун Саэдовлул «Илчилун».
Аьрасатнаву февраль революция хьуну мукьахсса чIумал тани Дагъусттаннал хъун шагьруну бивкIсса Тамирхан-Щурагьун бувкIун бивкIссар муниннин оьруснал личIи-личIисса шагьрурдай дуклай бивкIсса дагъусттанлувтал-студентътал. КIикку миннал сакин бувну бивкIссар Дагъусттаннал чантI учаврил ва агитациялул бюро. Мунийн та чIумал лакку мазрай чайссагу бивкIун бур «Дагъус­ттан чанна бай жямиаьт» куну. Му бюрорай каялувшиву дуллай бивкIссар Уллубий Буйнакский ва Гьарун Саэдов. Му бюрорал хIукмулийну, 1917-кусса шинал июнь зурул 3-нния байбивхьуну, итабакьлан бивкIссар лакку мазрайсса, циняв зунттал халкьуннайн цашиврийн, тархъаншиврийн, архIалшиврийн, чантI учаврийн оьвтIисса, мукьра лажиндарайсса, нюжмардий цал буккайсса, аьжам хатIлийсса, «Илчи» цIанилусса кказит.
Лакьиннин итабавкьуну бур бувагу урчIва кказит. Амма ми къачIявусса кказитирттай рирщусса макьалартту, миннул бартбивгьусса мурадру тIурча, бур цаннияр ца хьхьичIунсса, агьамсса, ххазиналул ххуллу-ххуттайсса, лакрал ва Дагъус­ттаннал бестселлерду кунма ябан аьркинсса.
ХIакьинусса «Илчилул» ва номерданияту байбивхьуну, Гьаруннул «Илчилул» 100 шинал таварихрацIунгу бавхIуну, жу кьаст лахIарду рищун тай урчIвагу кказитрава язи дургьусса цаппара макьалартту, мюрщи-хъунисса бутIри. 1998-ку шиналсса жула ттимур «Илчилийгу» бивщуну бивкIссар ми урчIвагу номер. Цимил тикрал хьурчагу, вай материаллу мудангу мюнпатну дацIансса дур, духдуккансса дакъар.
Руслан Башаев
«Илчи» №1, 3 июнь 1917 шин

Шяъван зурул 25-нний дяъви бивсса кIану

БутIри

ЦIарава ва оьттува дуккан дурар дуниял. АцIния ша­нна паччахIлугъ куннийн ку ххярххун, шанна шин хьунура дур. ПаччахIлугърал амрулул заллухъруннал уттинин цала канихьсса агьалийнай зулмурдий буллай бикIаву къагьану, цала-цала мискиншиврулсса буллалисса халкь бувцуну, бавкьунни дяъвилул цIаравун, литIлатIи куннал ку, куну. Жан дуккан­ссар зул махъсса кулпатрал ва оьрчIал, — куну.
Жу къабайбишарду дяъви цавайннал чавай; жуй къархьуссар аьй, вайминнал чавай; жу дунияллий хIакьмур бачин бан буллалиссару, цавайннал чавай; жу жула ватан душманнал хъямала къадан талатиссару, вайминнал чавай, мукунсса махъру буслай, халкь хъяврин буллай, цала къатта-къушлия буцан бувну, арамтал бавкьуну цIаравун ­оьттул нехру рутIлатIи бувунни.

Инсантурал захIмат бувну дурсса ватанну ттуплил ккулларду битлай, хараб дурну гьан дурунни. Хъунисса шагьрурду, чарий-чару къабивтун, эяллайн буккан бувунни. ХIисав дакъа­сса цайми-цаймигу зараллу биян бувунни. Дяъвилул тахсирлувталгу хIачIлай, рурцуну, рирщуну къавтIий, шаппа-шаппа щябивкIунни. Ца-ца чIумал литIлатIисса халкьуннах дурламарттавух бургангу лаглай.

Ччарча, хьхьирил лултту, ччарча ттуруллал ялтту талатаву дурунни, куннал ку ккашил литIун банну тIий. Букъавсъсса махъру, дукъарсса хIилла къариртунни, (амма ялагу цавайннаща цавай никирттайн бивчуну, миннат буллали бан къавхьунни). Куннал ку бас буллай, куннайн ку ххяхлай, инжит хьуну, бувххунни аьрал. Махъсса агьалийнан дукансса чан хъанан диркIунни. Ласаймур ххира хьунни. ПаччахIлугърал ххазнардай арцу духлаглан диркIунни. ИвкIусса, ивщусса къавхьу­сса къатта чансса ливчIунни. Гьарца паччахIлугърал хьхьичI ялун бучIантIисса ккашил дарс дацIлан диркIунни.

Истамбул лакъавсун къа­бикIан, Австриянал паччахI лиян анну тIий, чагъарданул писттуннугу пIякь учин дуллай, халкь инжит буллай бунува, му заманнай аьзиз хьу­сса оьрус­нал халкьуннал, экьи ливчуну паччахIгу, миннал лагма-ялттусса къачагъ министр­талгу дуснакьрайн бавкьуну, паччахIлугърал амру-ихтияр цахьхьунна ларсунни. Дирхьунни хIурият. Дуллунни гьарца халкьуннахьхьун, гьарца инсаннахьхьун, личIи акъа, ихтияр.

Оьруснал хIурият ласайхту, аьрал ливну бавчуна. Утти аьра­луннал министр аьралуннал ял­тту уклай ур, аьралуннавун чан­ссарагу низам рутан къабю­хъайвав тIий.
Багъдадлив, Арзурумрай, Балканнай, Германнал дазурдай, Италиянал чулух аьраллу бавцIуну бур. Аьраллу був­ххун бушиву чIалай бур. Дакьаву гъанну душиву чIалай дур. Микку-тикку ттуплил, ттупанг­рал чIурду чан къашай, амма ттупангру ва ттупру, дакьаву тIий, битлай бур; дяъвилул пуржинну чIуллай, чIуллай бивкIун, тти лапва хIура буклай бавчунни.

Жул мажлис

Ва кказит буллалисса студентътурал, учительтурал цайми халкьуннан зад лахьхьин бан, бувчIин бан ччисса, халкьуннаха зунну, хIуриятраха къуллугъ банну тIисса халкьунналли. Ми халкьуннал мажлис буссар Щурагь. Мунил отделение (кьисму) гьарца округрай бикIантIиссар. Жул зузаврил мяънагу цIана дунияллий хъанахъисса задирттая жула Да­гъусттан къюкIну къаличIавур.
ХIурият цирив, республика цирив, социалистал царив – микку-тиккунсса, азара зад цаймигу бур, халкьуннан къабувчIайсса: ягу бувчIуну чIалайнугу, къабувчIайсса. Халкьуннан, яла-яла, цивппа ссаха зунтIиссарив къакIулли. Ца камисартал битаву, комитетру баву ххай бур хIурият ва даймур даву.
Жу, ми мюршсса задру кьабивтун, халкьуннахь цанмагу, цала хъиривсса авладрангу мунпааьт бусса задру канил бугьияра тIун тIий буру. Жула гьар цума-цанналгу чичин бюхъай­сса кказитри ва. Ванил ихтияргу ва хьхьичI бувсъсса мажлисрахьри дусса. Лакку мазрай кказит бакъа тIий жущава бю­хъайссаксса ччяни «Илчи» бу­ккан барду.
Утти умуд бур, цайми мазурдийгу вайми задру гъалгъатIи бувсса кказитру буккан бан му мажлисрал отделение тIитIара тIий, чIа тIий буру лакрал дур­ккуминнахь: жул программа, жул ишру кIул хьун ччарча, мугьлат бакъа жучIан чичара!
Жул мажлисрал член хьун ччай бухьурчан, мувгу баян бара!
Жул членталгу, жул арцугу чансса дур. Областной комитет­рал 500 къуруш итадаркьунни. Яла вари чинсса кумаг бан бувар жун. Амма гьарца мазрай аьркинсса зару бишлан, чичлан щархъайх арамтал гьан буллан, халкьуннахь лекция (насихIатру) буклан. Муния тинмай аьркин­сса цIусса луттирду ласун, цаймигу задирттан арцу аьркинну дур. Яла кумагран арамталгу аьркинну бур…
Гьарца жул даву ххуй дизай­сса адиминал мунил чулухагу пик­ри бача, кумаггу бача!
Жул мажлисрал адресгу вари: гор. Т-Х. Шура, Дагестанское Просвет агитационное бюро.

«Миннат»

Жу миннат буллай буру гьарца лаккучувнахь: гьар чичин кIулманахь, жучIан гьарца щархъая, гьарца шагьрулия хавар гьан бара тIий. Бан аьркинмур: халкьуннахь буллали чинмур, мабари чинмур жучIан чичара тIий.
Халкьуннал мунпааьтру бу­сса затру кказитрай бищун ххариссару жу.
Хъиривгу буссар