Уттигъанну жула билаятрай Евразиянал хъаннил форумрай хIасул бувсса хасъсса группалул сакин бувну бур «Евразийское женское сообщество» тIисса интернет-портал. Мунил сияхIрайн ларсун дур Аьрасатнавусса 2500 хъаннил сакиншинна. II-сса Евразийнал хъаннил форум хьунтIиссар 2018 шинал Аьрасатнал Федерациялул Мажлисрал ва Федерациялул Советрал каялувшиндаралу.
З. АьбдурахIманова
Цалчинсса форумрай хIукму хьунугу бивкIссар
www.eawpress.ru интернет-площадкалий жула ва чил билаятирттаясса хъаннил масъаларттая бусласисса макьалартту, постру бишлан. Вай бакъасса, муний бюхълай бур мукунма Евразиянал хъаннил форумраясса ва ялун нанисса мероприятиярттаясса баянбавуртту ва цуппа форумрал онлайн-трансляциягу ккаккан. Интернет-порталданий мукунна ккаккан бюхълай бур фоторепортажру ва видеосюжетру, пресс-релизру ва хъиривлаявурттал хIасиллу, дайджестру ва обзорду. Порталданий цила-цила мяъна-мурадрал бутIри бур: «Форумрал хаварду», «Сообществардал хаварду», «Сенатортурал хаварду», «Хъами ва чирилул давуртту». ВайннуйхчIин кIул хъанай бур личIи-личIисса билаятирттайсса жяматраву, миккусса личIи-личIисса оьрмулул арардаву хъаннил бугьлагьисса кIанттая, миннул чялишсса гьурттушиннарая.
Порталданийсса агьамми хаварду ингилис мазрайн таржума бувну бур. Ва иширалгу порталданул бусрав-сий лахъ дуллай дур дунияллийсса билаятирттай. Портал сакин баврийну билаятрал СМИ-рдангу хъунмасса кумаг хъанахъиссар цумур-цагу хъаннил сакиншиннарая ци-бунугу аьркинсса информация кIул бавриву.
Интернет-порталданул ца цамургу къулайшинна дуллай дур. Микку хъаннил гьарцагу сакиншиннараща бюхълай бур цалла-цалла «страница» тIиртIуну, цала ккаккиярттая, хьхьичIуннайшивурттая ягу буруккинтрая буслан.
Федерациялул Советрал Председательнал хъиривчу Галина Кареловал бусаврийну, цIусса интернет-портал сававну билаятрал хъаннил сакиншиннардища бюхълай бур цаннищал ца дахIаву дуну, хIала-гьурттуну зун.
