Щалагу дунияллий заргалтурал кьинину кIицI дувайсса январь зурул 31-нний МахIачкъалалив, Халкьуннал художествалул сянатирттал центрданий тIиртIунни Дагъусттаннал заргалтурал выставка «Серебряная сказка».

Андриана Аьбдуллаева
Шикку ккаккиялун дирхьуну дия Дагъусттаннал заргалтурал магьиршиву исват дуллали­сса ябатIин къахъанахъисса эмарат­ру: арцу-мусил чIюлушиннарду, ярагъ, тIахIни-кIичIу. Оьргърал, УнцIукIуллал, Бархъаллал усттартурал канила дурксса цаннияр ца ххуйсса экспонатру. Выставкалул сакиншинначитал хьунни Дагъус­ттаннал Туризмалул ва художествалул сянатирттал министерство.
Выставка тIитIлай, ихтилат бунни Дагъусттаннал туризмалул ва художествалул сянатирттал министр МахIаммад Исяевлул. Ванал кIицI лавгунни Дагъусттаннай заргалшиву буттал буттахъая шихуннай ирсирай нанисса, цинна хасъсса аьдатру дусса сянат душиву.
— Дагъусттаннал заргалтурал эмаратру Аьрасатнал циняв регионнайх ппив хьуну дур. Укунсса выставкартту дуллай, Министерствалул хIарачат буллай бур Дагъусттаннал заргалтурал искусство хъиннура машгьур дан, му дунияллул даражалийн лахъан дан. Халкьуннал художествалул сянатирттах хIакьину хъуннасса къулагъас дур федерал центрданул чулухагу.
Жула усттартурал канила дурк­сса чIюлушиннардаву миллатрал колорит яхьуну дур, хIакьину ми машгьурсса заргалтурал брендир­ттащал ччалан бюхъайсса даражалул дур, — увкунни МахIаммад Исяевлул.
Цала ихтилатраву министр­нал хъиривчу ХIамзат Гъази­махIаммадовлул кIицI лавгунни арцул кьай дуван хъунмасса захIмат бишин багьайшиву, ва му хъунма­сса гьунар ва ссавур аьркинсса даву душиву.
– ХIакьину ва выставкалийн дуккан дурну дур жула заргалтурал яла яргми, яла ххуйми кьай-кьуй.
На ххарину ура Дагъусттаннай укун гьунар бусса, жула культура ирсирай дачин дурсса, жулла рес­публика, Аьрасатнаву дакъассагу, дазул кьатIувгу машгьур дуллалисса усттартал буну тIий, — увкунни ванал.
Ихтилатру бунни «Дагъусттаннал шяравалу» музейрал хъунмур Зумруд Сулаймановал, Дагъусттаннал Изобразительный искусствардал музейрал хъунмур СалихIат ХIамзатовал, Дагъусттаннал Художниктурал союзрал председатель МахIаммад Кьурбанаьлиевлул.
Выставкалий ккаккан дунни модельертал Минажат ХIасановал ва Зайнаб Жамаловал хIадур дурсса миллатирттал хъатIул гьухърал ва хъаннил янналул коллекция.
Жула лаххия тамашачитуран ккаккан дан бувксса исвагьисса душварал, Художествалул училищалул ва Дагъусттаннал педуниверситетрал художествалул ва графикалул факультетрал студентътурал бувккунни шеърирду.
Выставка чIюлу дунни укунсса мероприятиярттаву мудангу гьур­ттушинна дайсса Жанна Кьурбановал.
Выставкалул экспонатирттай тамаша бувну махъ, цинявппа бавтIун, Дагъусттаннал заргалтурал сянат хьхьичIуннай даврил хIакъиравусса ккуркки стол бунни.
Ва кьини бучIан къавхьу­сса, ккаккан ччисса бухьурча, выставка февраль зурул 10-ннийнин дикIантIиссар.