Февральданул 8-нний МахIачкъалалив Миллатрал библиотекалуву хьунни ДР-лул Культуралул министерствалул коллегиялул батIаву. Му хас дурну дия ларгсса шинал дурсса даврил хIасиллан ва ва шинал дувансса давурттал дазу-кьарал даврин. БатIаву дайдирхьуна культуралул зузалтран Аьрасатнал ва Да­гъусттаннал паччахIлугърал наградартту дулаврия.

Бадрижамал Аьлиева

[responsivevoice_button voice=»Russian Female» buttontext=»ВИЧIИ ДИХЬЛАН»]  ДР-лул культуралул министр Зарема Буттаевал цилва доклад­раву кIицI лавгуна 2016 шинал Культуралул министерствалул даву тIайла дурну диркIшиву идарарттал даву чялиш даврийн, гьунар бусса оьрчIал ва жагьилтурал чIарав бацIаврийн, халкьуннал аслийсса культура дуруччаврийн ва хьхьичIуннай даврийн, мукунна регионнал ва дунияллул халкьуннал дянивсса культуралул арарду хьхьичIуннай даврийн. Хъунна­сса къулагъас дурссар Аьрасатнал Президентнал ва Дагъусттан Республикалул БакIчинал Рисаларттаву ккаккан бувсса масъалартту щаллу баврих, Аьрасатнал Президентнал «майрал» ХIукмурду биттур баврих.
Ларгсса шинал – Аьрасатнал Кинорал шинал – республикалий дурссар халкьуннал творчествалиясса видеофильмрдал региондалул конкурс «Ссурул­ккуртта», дунияллул халкьуннал дянивсса кинофестиваль «Сталкер», «Дакьаврил Дагъусттан», «Маяк» кинофестиваллу, «Фестиваль уличного кино», мукунна щалагу Аьрасатнал акция «Искусствалул хьхьу». Культуралул министрнал мукунма бувсунни Кинорал фондрал федерал программалийн бувну, 100 азарунния ливчусса инсантал ялапар хъанахъисса кIанттурдай, масалдаран, Буйнакскаллал, Ахъушиял ва Къарабудахккантуллал районну, бикIантIишиву уттизаманнул оборудованиялущалсса цIусса кинозаллу.
Хъуннасса агьамшиву дусса хьунни Азирбижаннавусса Да­гъусттан Республикалул Кьинирду, Республикалул БакIчи Рамазан АьбдуллатIиповлул сипталийну дурсса. Ведомствалул бакIчинал ялагу бувсунни ларгсса шинал лавайсса даражалий хьусса культуралул акциярттая ва проектирдая. «Культура – Дагъусттаннал оьрчIан» тIисса проектравух 2016-ку шинал гьуртту хьуну ур 8 азара оьрчI, республикалул муниципал сакиншиннардай (6 шагьру ва 22 район) хьуну бур творчествалул 28 десант.
Цила ихтилатраву культуралул министрнал чIурчIав дунни ларгсса шинал юбилейрдан хас бувсса мажлисир­ттах ляличIиссара къулагъас диркIшиврий.
— Ларгсса шин юбилейрал шин дия СССР-данул халкьуннал артист, композитор Мурад Къажлаев, РСФСР-данул халкьуннал артист, композитор Ширвани Чаллаев, Дагъусттаннал халкьуннал чичу АхIмад-хан Абу-Бакар, Дагъусттаннал халкьуннал шаэр Юсуп Хаппалаев кунмасса культуралул ишккаккултран. Хьунни Оьруснал драмтеатрданул (90 шин), МахIачкъалаллал музыкалул училищалул (90 шин), Дагъус­ттаннал паччахIлугърал ссихьрал театрданул (75 шин) ва Рес­публикалул Культуралул министерствалул (80 шин) юбилейрду, — увкунни Зарема Буттаевал.
Гихунмай ванил бацIаву дунни республикалул театрдал даврий, бувсунни, багьайсса материал база бакъашиврийн бувну, гастроллал ккал-аьдад кутIа дуршиву, цуксса хIайпнугу.
Бувсунни ларгсса шинал яргсса ишруну хьушиву «Лезгинка» ансамбльданул базалий дурсса Миллатрал пишакарсса коллективирттал союзрал съезд, «Порт-Петровскаллал ассамблеяртту» ва «Дагъусттаннал фанфарду» фестиваллу.
Министрнал мукунма кIицI лавгунни ляличIиссара къула­гъас дуллан багьлай бушиву ххи­сса кIулшиву дулайсса школар­тту ялу-ялун чан хьуну нанаврил масъалалух. Ванил бусаврийн бувну, 2015 шинах бурувгун, рес­публикалийсса ххисса кIулшиву дулайсса школарду чан хьуну бур 6 единицалул.
Гихунмай Зарема Буттаевал цIа дунни республикалул музейрдал даврия, мукунма бувсунни Республикалул Халкьуннал творчествалул къатлул, рес­публикалул библиотекарттал даврия.
Коллегиялий цIакь дунни 2017 шинал дуван дакIнийсса агьамсса давурттал план. Хьунни ихтилатру экстремизмалийн ва терроризмалийн къаршину ведомствалул дуллалисса ва дуван дакIнийсса давурттаягу.
Ххал диргьунни Дагъусттан Республикалул БакIчи Рамазан АьбдуллатIиповлул Рисалалувусса агьамми тезисру. Докладру бунни культуралул министрнал хъиривчу, Республикалул Халкьуннал творчествалул къатлул директор Марита МухIадовал, Къумукьнал театрданул директор Скандарбек Тулпаровлул.